Շիրակի մարզի ընդհանուր իրավասության դատարանում Աշոտ Մանուկյանի նախագահությամբ ավարտվել է Արտյոմ Կարապետյանի գործի դատական քննությունը:
Ըստ մեղադրանքի՝ 31-ամյա Արտյոմ Կարապետյանը 2014 թվականի հունվարի 13-ին համացանցի «Վ Կոնտակտե» կայքի միջոցով ծանոթացել է մարզի գյուղերից մեկի բնակչուհի Ա.-ի հետ:
Այնուհետև Ա.-ի տվյալներով ու նկարով բացել է կայքէջ, նրան արատավորող, պատիվն ու արժանապատվությունը նվաստացնող ու վարկաբեկող տեղեկությունները համացանցի կայքերում հրապարակելու սպառնալիքով, շորթման եղանակով գույք հափշտակելու դիտավորությամբ պահանջել է 50 հազար դրամ:
Սակայն արդյունքում Արտյոմ Կարապետյանը ձեռք է բերել մեղադրյալի կարգավիճակ:
Նրան մեղադրանք է առաջադրվել շորթման համար՝ ՀՀ քրեական օրենսգրքի 182 հոդվածի 1-ին մասով:
Արտյոմ Կարապետյանի խնամքին 2 անչափահաս երեխա կա:
Դատարանում Կարապետյանն իրեն լիովին մեղավոր է ճանաչել, նրա միջնորդությամբ գործը քննվել է արագացված ընթացակարգով:
Ընդհանուր իրավասության դատարանը Արտյոմ Կարապետյանին մեղավոր է ճանաչել շորթման համար ու դատապարտել է 450 հազար դրամ տուգանքի:
