34 500 դրամ արժողությամբ բադի ապխտած կրծքամիս, դոնդողապատ մսակտորներ, 16.500 դրամանոց դոնդողապատ ռոլլեր, հնդկահավի մսից երշիկ՝ 15.900 դրամ, 15.900 դրամ արժողությամբ խոզի լեզու, նույնքան արժողությամբ հնդկահավի միս, և այս ամենը ընդամենը մեկ կլիոգրամի դեպքում:
Այս էկզոտիկ մսամթերքները ձեր սեղանին ունենալու համար պետք է գնումներ կատարեք «ՍԱՍ» սուպերմարկետից: Բայց միայն գներին ծանոթանալուց հետո ամանորյա տոնական տրամադրությունը փոխարինվում է շոկային տրամադրությամբ: ՀՀԿ-ական գործարար պատգամավորին պատկանող այս սուպերմարկետում վաճառվող թառափի ձկնկիթի 250 գրամն արժե 327 հազար դրամ: Ձկնկիթի մեկ այլ տեսակի 200 գրամն արժե 160 հազար դրամ, 100 գրամը՝ 82 հազար դրամ, 50 գրամն արդեն՝ 42 հազար դրամ:
Բաստուրմայի 1 կիլոգրամի գինը սկսվում է 10 հազար դրամից, սուջուխը՝ 7-8 հազար դրամից: Խոզի մսի մեկ կիլոգրամի արժեքը սկսվում է 4200 դրամից, տավարինը՝ 4500-5500 դրամ է:
Այս սուպերմարկետում թանկարժեք են նաև սովորական հյութերը, ապակեպատ տարաներով հյութերն էլ ավելի թանկարժեք են՝ համեմատած այլ խանութներում ներկայացվածների: Իսկ եթե որոշեք գնել ոչ տեղական արտադրության խմիչքներ՝ շամպայն, ապա պետք է պատրաստ լինեք վճարել 50-60, իսկ որոշ դեպքերում անգամ 100 և 200 հազար դրամ: Թանկարժեք են նաև կոնֆետները, որոշների դեպքում 1 կիլոգրամն արժե 22-25 հազար դրամ:
Ուշագրավ է նաև, որ անգամ տոնական ծառի զարդարանքների գներն են ապշեցուցիչ: Ինչ է թե՝ ներկրված են չգիտես որ երկրից ու ինչ-որ առանձնահատկություններ ունեն:
Բարեբախտաբար, դոլարի կուրսի կարգավորումից հետո էականորեն նվազեց ընդեղենի գինը: Պոպոկի գինը, որ հատել էր արդեն 15 000 դրամի սահմանը, վերանայվել և դարձել է 5-6 հազար, իսկ առավել լավ որակի պոպոկն արժե 8000 դրամ: Եվ նույն վիճակն է նաև շուկաներում:
Նշենք, սակայն, որ Երևանում գործող մյուս սուպերմարկետներում գներն այսքան սահմռկեցուցիչ չեն: Ճիշտ է, էլի բարձր են համեմատած փոքր ու միջին խանութների ու շուկաների գների, բայց միևնույն է՝ «ՍԱՍ»-ն այդ առումով անգերազանցելի է: Եվ եթե քաղաքացին որոշի Նոր տարվա գնումները «ՍԱՍ»-ից կատարել, ապա նվազագույնը մի քանի հազար դոլար, հաստատ, կծախսի: Իսկ դատելով այս օրերին սուպերմարկետի հաճախորդների թվից՝ Երևանում քիչ չեն այդպիսի քաղաքացիները:
