Սուրբ ծննդից առաջ Հռոմի պապ Ֆրանցիսկոսը հարցազրույց է տվել արգենտինական La Nacion թերթին՝ պատասխանելով եկեղեցու կյանքում վերջին իրադարձություններին և անձնական ծրագրերին առնչվող հարցերին:
Ֆրանցիսկոս պապը պատասխանելով հարցին, թե իր համար ինչ է նշանակում Հռոմի պապը լինելը, խոստովանել է, որ իր ընտրվելուց հետո ինքն իրեն ասել է. «Խորխեն չի փոխվի, նա կլինի իր նման, որովհետև փոփոխություններն այդ տարիքում ծիծաղելի են»: Իր առողջության մասին պապն ասել է. «Ես որոշ տկարություններ ունեմ, որոնք նկատվում են իմ տարիքում, սակայն ես Աստծո ձեռքում եմ և մինչև հիմա կարողանում եմ պահել աշխատանքի քիչ թե շատ լավ տեմպ»:
Խոսելով վերջերս Սինոդում անցկացված ընտանեկան թեմայով քննարկումների մասին՝ Ֆրանցիսկոսն ասել է, որ սինոդալ ժողովը «խորհրդարան» չէ, այն բաց տարածություն է, որը պահպանում է Սուրբ Հոգին:
Անդրադառնալով հոմոսեքսուալ միություններին Եկեղեցու դիրքորոշմանը վերաբերող որոշ շրջանակների կասկածներին՝ Ֆրանցիսկոսը հստակեցրել է, որ «Սինոդում ոչ ոք չի խոսել միասեռ ամուսնությունների մասին»: Քննարկվել է իրավիճակն այն ընտանիքներում, որտեղ երեխաներից մեկն ունի հոմոսեքսուալ կողմնորոշում:
Վատիկանի բանկի վերաբերյալ Ֆրանցիսկոս պապը նշել է, որ «այն հրաշալի է աշխատում», իսկ տնտեսական բարեփոխումը «հաջողությամբ առաջ է գնում»:
Առաջիկա պապական այցերի վերաբերյալ Ֆրանցիսկոսն ասել է, որ հնարավոր է՝ ինքը 2016թ. մեկնի Արգենտինա, իսկ 2015թ. նախատեսված են այցեր 3 այլ պետություններ:
