«Առաջին լրատվական»-ի զրուցակիցն է ՀՀՇ նախկին անդամ, մաքսայինի նախկին պետ Երջանիկ Աբգարյանը։
-Պարոն Աբգարյան, ակնհայտ է, որ Հայաստանի ներկայիս ֆինանսական ճգնաժամը պայմանավորված է Ռուսաստանի ճգնաժամաով, ՀՀ և ՌԴ տնտեսությունները հաղորդակցվող անոթներ են: Կարո՞ղ էր Հայաստանը խուսափել սրանից, ունե՞ր արդյոք մեղմելու տարբերակներ:
-Երբ որ մի պետություն չի ունենում սեփական ֆինանսատնտեսական քաղաքականություն՝ որևէ կողմից փչող սովորական՝ թույլից չափավոր քամիներն էլ կարող են սասանել այդ պետության ֆինանսատնտեսական և նույնիսկ քաղաքական հիմքերը: Ես համաձայն չեմ Ձեր պնդմանը՝ թե «ՀՀ և ՌԴ տնտեսությունները հաղորդակցվող անոթներ են»: Այդ ի՞նչ անոթների մասին եք խոսում, երբ ՀՀ-ից ՌԴ ներմուծվող ապրանքներն այդ երկրի արտաքին առևտրում նույնիսկ ամբողջական մեկ տոկոսի էլ չեն հասնում, էլ չեմ խոսում ընդհանրապես ՀՀ-ՌԴ և ՌԴ-ՀՀ առևտրի անոթների արտառոց «յուրահատկությունների» մասին, որոնցից բազմաբնույթ գաղութարարության և կոռուպցիոն նեխածության գարշահոտություն է «բուրում»: Հայաստանի այսօրվա կախվածությունը Ռուսաստանից ամբողջապես արհեստական է, որովհետև այդ երկու պետություններն էլ զուրկ են շահավետ աշխատող տնտեսական համակարգերից, և եթե այս գործերից հանում ենք տրանսֆերտների հանգամանքը, ապա ես ֆինանսատնտեսական այլ հիմքեր չեմ տեսնում այսօր ՀՀ-ի՝ ՌԴ -ից կախվածությունը պահպանելու համար:
-Ի՞նչ փոփոխություններ են անհրաժեշտ Հայաստանի ներսում և հայ ռուսական հարաբերություններում՝ կասեցնելու համար այս գահավիժումը:
-Կարծում եմ, որ Հայաստանի ներսում և հայ-ռուսական հարաբերություններում որևէ արժեքավոր գործոն ու հանգամանք չկա, որն ի վիճակի է կանգնեցնել Ձեր նշած «գահավիժումը», որն ընթանում է դեպի գերեզման: Առայսօր Հայաստանը կախ է ընկած ՌԴ-ի քղանցքներից և պատրաստակամություն է ցուցաբերում հանուն Ռուսաստանի էշ նահատակ դառնալ: Եթե մենք այս ուղեգծից դուրս գալու շուտափույթ քայլեր չենք ձեռնարկում՝ ինչպես դա փորձում են անել Բելառուսն ու Ղազախստանը, ապա մենք՝ հայերս, սեփական ձեռքով մեր հողերն ի վերջո հանձնելու ենք մեր դարավոր թշնամիներին:
Ստեղծված իրադրության մեջ պետք է գնալ քաղաքական ռիսկի և առաջնահերթորեն կայացնել մի շարք տարաբնույթ որոշումներ. ա) ԵԱՏՄ-ին միանալուց հրաժարվելու մասին, բ) ռուբլու մուտքը Հայաստան ժամանակավորապես՝ տարաբնույթ միջոցառումներով սահմանափակելու մասին, գ) Հայաստանում գտնվող ռուսական զորքերի կենսագործունեությունը ֆինանսավորելուց և ապահովելուց հրաժարվելու մասին, դ) միջազգային իրավունքի հիման վրա չեղյալ հայտարարել և ազգայնացնել անօրինականորեն Ռուսաստանին որպես վերջինիս պետական սեփականություն զիջված ՀՀ բոլոր պետական ունեցվածքները, ե) բանակցություններ ձեռնարկել միջազգային հանրության և մերձակա հարևանների հետ Հայաստանի վերաինտեգրման խնդիրներով: Բայց… մինչ այդ, հենց այս նախատոնական օրերին պետք է կտրել այսօրվա հայ ռուսամոլության պորտալարը կայսերապաշտական Ռուսաստանի հետ կապող օղակից՝ Սերժ Սարգսյանը անմիջապես պետք է հեռացվի իշխանությունից: Կարծում եմ՝ հայ ժողովրդի փրկության այսօրվա առհավատչյան պարփակված է մեր քաղաքական և պետական գործիչների խիզախ որոշումներ կայացնելու և իրագործելու կամքի ու կարողության մեջ:
Լուսանկարը՝ news.am-ի
