Չնայած այսօր վաղ առավոտից դոլարի փոխարժեքն աստիճանաբար նվազում է, սակայն շատ ապրանքատեսակների գները դեռևս չեն նվազում: Աստիճանաբար նվազում է միայն երեկ աստղաբաշխականի հասած շաքարավազի գինը, սակայն ձուն, ալյուրը, հացը և առաջին անհրաժեշտության այլ ապրանքներ շարունակում են մնալ նույն գնին:
«Մաքս կոնցեռն» ընկերության ղեկավար Խաչիկ Մանուկյանը, անկախ կրած վնասներից, շարունակում է աշխատել և համարում է, որ ստեղծված վիճակը այնքան կրիտիկական չէ, որքան անտեղի պանիկայի արդյունք:
«Այսօր ավելի շատ պանիկա է, քան հիմնավորված, անալիզ արված վիճակ: Երբ որ պանիկան կանցնի, նոր կհասկանանք՝ ինչ անել: Թե չէ՝ այսօր Ռուսաստանը մի բան անում է, դա միանգամից տարածվում է մեզ վրա, առանց հիմնավորման»,-ասաց Խաչիկ Մանուկյանը:
Նրա խոսքով՝ հենց առկա պանիկայի պատճառով էլ դոլարն այդքան թանկացավ: «Ինչո՞ւ դոլարն այդքան թանկացավ. որովհետև դոլար չկար: Եթե էսօր ձու էլ չլինի, ձուն էլ կթանկանա: Եթե մի բանի պահանջարկ կա, այն պետք է շուկայում լինի: Դոլարը շուկայում պետք է այնքան լիներ, որ պանիկա չառաջանար: Բայց բոլորը մտածում էին, որ եթե դոլարը տանեն տունը պահեն, դա իրենց օգուտ կտա: Նույնը իրենց քայլերով հաստատեցին նաև մեր բանկերը, երբ սկսեցին դոլար չվաճառել»:
Մանուկյանի խոսքով՝ արտարժույթի տատանումների ֆոնին տեղական արտադրանքը, այդ թվում՝ ձուն, չէր կարող չթանկանալ, քանի որ այդ արտադրության մեջ օգտագործվող շատ բաղադրիչներ ներկրվում են հենց դոլարով: Այդ թվում, իրենց արտադրության օրինակով, հավի կերը և այլ ապրանքներ: «Եթե դոլարով ենք կերը ներկրում, ի՞նչ պետք է անենք, եթե չթանկացնենք: Բայց դե, այս պայմաններում էլ աշխատում ենք նորմալ, իսկ վնասները մեկ-երկու օրվա վնաս է, էլի: Կաշխատենք, կլրացնենք»,- ասաց Մանուկյանը:
Նա հավելեց, որ այն պնդումները, թե դոլարի արժևորման ֆոնին հնարավոր է զարկ տալ տեղական արտադրությանը, այնքան էլ հիմնավորված չեն: Տեղական արտադրություն սկսելու համար կրկին հարկավոր է ինչ-ինչ ապրանքներ ներկրել, ինչն արդեն կապվում է դոլարի հետ:
Կաթնամթերքի արտադրությամբ զբաղվող «Բոնի լայթ» ընկերության տնօրեն Գարիկ Սարուխանյանն ասաց, որ հնարավոր էր այս օրերին ձերծ մնալ տեղական արտադրանքի կտրուկ թանկացումներից: Եւ իրենց ապրանքատեսակների օրինակով նշեց, որ թանկացումն աննշան էր կապված տարաների հետ, իսկ կաթնամթերքի մասով թանկացում չի եղել, քանի որ արտադրության մեջ օգտագործվում է տեղական անարատ կաթ: «Իմ կանխազգացումով էս դոլարի թանկացման խաղերը երկար չէր տևի: Էնպես որ պետք չէր գնալ նման քայլերի: Մեր արտադրությունը կապված է տեղական կովերի կաթից: Մեր կովերը դրամով են կթվում եւ մենք ամենամինիմալն ենք շփվում դոլարի հետ»,-ասաց նա:
