Մերձավոր Արևելքի և Հյուսիսային Աֆրիկայի երկրներում ժողովրդավարական հեղափոխությունների, այսպես կոչված «արաբական գարնան» հասցրած վնասը կազմում է 225 միլիարդ դոլար: Այս մասին հաղորդում է BreakingViews-ը՝ վակայկոչելով սեփական հաշվարկները:
2010թ. Արժույթի միջազգային հիմնադրամը կանխատեսել էր, որ 2011-2015թթ. Եգիպտոսի, Թունիսի և Լիբիայի տնտեսությունների կրած ընդհանուր վնասը կկազմի 2.2 տրիլիոն դոլար: Այժմ այս ցուցանիշը իջեցվել է 10%-ով, ինչը կազմում է «արաբական գարնան» հասցրած վնասի չափը:
Լիբանանյան The Daily Star թերթը նշում է, որ BreakingViews-ի հաշվարկներն օբյեկտիվ չեն, քանի որ ԱՄՀ-ի կանխատեսումներում ՀՆԱ-ի իջեցման վրա ազդող բոլոր գործոնները հաշվի չեն առնվել:
2011թ. ԱՄՀ-ի հաշվարկների համաձայն՝ արաբական պետությունների կորուստները կազմել են 55 միլիարդ դոլար:
Փորձագետները հստակեցրել են, որ Եմենում կորուստը կազմել է ՀՆԱ 5.4%, Թունիսում՝ ՀՆԱ 5.2%, Եգիպտոսում՝ ՀՆԱ 4.2%: Հիմնական հարվածը հասցվել է Լիբիային և Սիրիային, որոնց կորուստները 2011թ. վերջի դրությամբ համապատասխանաբար կազմել են 7.7 և 6 միլիարդ դոլար:
2012թ. դեկտեմբերին Emirates 24/7 թերթը հաղորդել էր, որ Հորդանանի ծրագրավորման և միջազգային համագործակցության գլխավոր քարտուղար Սալեհ Խարաբշին արաբական հեղափոխությունների վնասը գնահատել է 120 միլիարդ դոլար:
2011թ. Մերձավոր Արևելքի և Հյուսիսային Աֆրիկայի արտասահմանյան ներդրումները նվազել են 24%-ով՝ հասնելով 50 միլիարդ դոլարի: Խարաբշիի խոսքերով՝ 2012թ. այս ցուցանիշը գնահատվում է 53 միլիարդ դոլար:
