Հունվարի 7-ին Իրանի իշխանություններն ազատ են արձակել քահանա Յուսեֆ Նադարհանիին, որը շուրջ երեք տարի անցկացրել է տեղի բանտերում քրիստոնեություն դավանելու համար:
Առաջին անգամ Նադարհանին ձերբակալվել է այն բանից հետո, երբ 2006 թ. փորձել է իր կրոնական համայնքի համար ստանալ պետական գրանցում:
Առաջին ձերբակալությունը երկարատև չի եղել, սակայն 2009 թ. քահանան դատապարտվել է երեք տարի ազատազրկման, քանի որ բողոքել է, որ իր երեխաներին դպրոցում իսլամ են սովորեցնում՝ առանց նրանց կամքը հաշվի առնելու:
Ինչպես հաղորդում է Fox News-ը, Իրանի իշխանությունները 2012 թ. սեպտեմբերին համաձայնում են ազատ արձակել քաղաքական ակտիվիստին, սակայն նույն թվականի դեկտեմբերի 25-ին կրկին ձերբակալում են նրան: Սուրբ Ծնունդի օրը քրիստոնյայի ձերբակալությունը միջազգային լայն արձագանք է ստանում: Թեհրանի հասցեին բաց նամակա են ուղարկում ամերիկացի կոնգրեսականներ Ջո Փիթսը և Քեյթ Էլլիսոնը:
Իրանի Իսլամական Հանրապետության օրենքների համաձայն՝ իսլամից հեռանալը և ցանկացած այլ կրոն դավանելը համարվում է հանցագործություն:
Նշենք, որ ներկա պահին Իրանի բանտերից մեկում շարունակում է մնալ Նադարհանիի փաստաբանը, որը երկրում ճանաչում է ձեռք բերել այլախոհների և այլադավանների դեմ գործընթացներին մասնակցելու շնորհիվ:
