Ամերիկացի լեգենդար երգիչ Էլվիս Փրեսլին 20-րդ դարի վառ ու յուրօրինակ անհատականություն է, նրան իրավամբ անվանում են «Ռոք-ն-ռոլի արքա» կամ կարճ՝ «Արքա»…
Էլվիս Փրեսլին ծնվել է 1935-ի հունվարի 8-ին` ԱՄՆ-ի Միսիսիպի նահանգի Տյուպելո քաղաքում: Նրա ընտանիքն աղքատ էր: Երգչի կարիերան նա սկսել է եկեղեցական երգչախմբում և արդեն 10 տարեկանում տոնավաճառում մրցանակ է ստացել ժողովրդական երգի կատարման համար: Նրան 11-ամյակի առթիվ կիթառ են նվիրել, իսկ մի քանի տարի անց Էլվիսը սկսել է լրջորեն հետաքրքրվել երաժշտությամբ:
Փրեսլիի սիրելի ոճերն էին քանթրին, սևական երաժշտությունը:
Դպրոցն ավարտելուց հետո նա աշխատել է որպես բեռնատարի վարորդ, բայց չի մոռացել իր սիրելի գործը: Էլվիսը մի քանի երգ է ձայնագրել, սկավառակը թողարկվել է միակ օրինակով` որպես նվեր մորը: Մեկ տարի անց 20 000 օրինակով թողարկվել է նրա առաջին սինգլը՝ That’s all right-ը, որը արագորեն սպառվել է:
Երգիչը համաշխարհային փառքի է արժանացել1956-ին. նրա Heartbreak Hotel սինգլը վաճառվել է ավելի քան մեկ մլն օրինակով: Դրան հետևել են ոչ պակաս սիրված Blue Suede Shoes-ը, I want You, I Need You, I Love You-ն: Փրեսլին դարձել է դեռահասների ու երիտասարդների կուռքը: Նրանք ընդօրինակում էին Էլվիսի հագուստի ոճը, շարժուձևը:
Էլվիսին սկսել են հրավիրել` նկարահանվելու կինոյում, իսկ 1960-ականների վերջը-1970- ականների սկիզբը նրա ակտիվ համերգային գործունեության ժամանակաշրջանն էր: Հենց այդ ժամանակ է նա ստեղծել իր հանրահայտ ոճը՝ ստրազներով ու ոսկով ասեղնագործված սպիտակ կոստյումները:
1973-ից հետո նա առողջական խնդիրներ է ունեցել, կախվածություն է ձեռք բերել դեղորայքից, և 1977-ի օգոստոսի 16-ին Էլվիս Փրեսլին մահացել է: Սակայն նրա երգերը, նույնիսկ տարիներ անց, շարունակում են ապրել ու մեծ սեր վայելել ամբողջ աշխարհում:
