Գերմանական վանքում հրդեհ է տեղի ունեցել, որի հետևանքով տուժել են տասը վանականներ, որոնցից մեկը 100 տարեկան է: Այս մասին հաղորդում է dpa-ն:
Հրդեհը տեղի է ունեցել կիրակի բավարական Ֆյուսսեն քաղաքի ֆրանցիսկյան վանքում: Կրակը բռնկվել է տեղական ժամանակով մոտ 06:30-ին վանքի ամենատարեց բնակչի՝ հարյուրամյա վանականի սենյակում: Հրդեհի պատճառը դեռ հայտնի չէ:
Արտակարգ իրավիճակների ծառայությունը տարհանել է վանքի բոլոր բնակիչներին: Ամենաքիչը վեց վանականի, այդ թվում՝ նաև հարյուրամյա ծերունու հոսպիտալացում է պահանջվել: Վերջինիս վիճակը ծանր է գնահատվում:
Բացի քահանաներից, տուժել են նաև մի հրշեջ և կին ոստիկանը. նրանք թեթև վնասվածքներ են ստացել: Դեպքի վայրում աշխատել է արտահերթ ծառայության գրեթե 170 աշխատակից: Մինչև կեսօր հրդեհը մարված է եղել:
Վանական շինություններին զգալի վնաս է հասցվել: Դրանց վերականգնման արժեքը կազմում է 100.000 եվրո: Հրդեհի հետևանքով նաև տուժել են կտավներն ու սրբապատկերները:
