Ուզբեկական Սոխ անկլավում ավելի քան 10 ղրղըզ է ազատ արձակվել իշխանությունների ու տեղի բնակիչների հետ բանակցությունների արդյունքում: Սակայն ապստամբները հրաժարվել են ազատել բոլոր պատանդներին:
Ներկայում շարունակվում են բանակցությունները: Իշխանությունները փորձում են ճշտել այն տեղեկությունը, համաձայն որի՝ պատանդների թվում են նաև երեխաներ` հաղորդում է Interfax-ը:
«Հունվարի 7-ի գիշերը բնակիչների հետ բանակցությունների արդյունքում ուզբեկական Սոխ անկլավի Խուշյար գյուղի բնակիչները ազատել են 14 կանանց՝ Ղրղըզստանի քաղաքացիների, որոնց օրեր շարունակ ապօրինի պահում էին տեղի հիվանդանոցում»,- այսօր հայտարարել է Բատկենի վարչակազմի ներկայացուցիչը, որի տարածքում է տեղակայված ուզբեկական անկլավը:
Նախնական տեղեկություններով` գերեվարված է մնում դեռևս 20 պատանդ:
Ուզբեկստանի և Ղրղըզստանի սահմանին անհանգստության ալիքները սկսվել են Չարբակ գյուղում սահմանային ուղեկալի կառուցումից հետո: Այդ անցագրային կետը պաշտոնապես բացվել է 2012թ. դեկտեմբերի կեսին` Ղրղըզստանի վարչապետ Ժանտորո Սատիբալդիևի այցի ժամանակ` տեղեկացնում է «Ազատիկ» ռադիոկայանը:
Հունվարի 5-ին սահմանապահները սկսել էին սահմանին անցկացնել էլեկտրալարեր, ինչը հարուցել էր Խուշյարի գյուղացիների դժգոհությունը: Գյուղացիները խանգարել են աշխատանքներին, իսկ նրանց հեռացրել են նախազգուշական կրակոցներով: Զայրացած գյուղացիները սկսել են ճանապարհներին կանգնեցնել ավտոմեքենաներ ու ծեծել վարորդներին ու ուղևորներին:
Խուշյարցիներն անարգել մտել էին Չարբակ գյուղ ու անկարգություններ հրահրելով` ուժով իրենց տարածք էին տարել 6 տեղացու, ապա մյուսներին պատանդ վերցրել Սոխում:
