Այսօր ՀԱԿԿ-ն հանդես է եկել հայտարարությամբ, որում կուսակցությունն իր անհանգստությունն է հայտնել ԲՀԿ-ի «ակտիվ քաղաքական գործողությունների անորոշ ժամանակով հետաձգելու» որոշման առթիվ՝ ընդհուպ նշելով, որ այն կարող է «դառնալ ճակատագրական սխալ»։ Կոնգրեսի այս հայտարարությունը խիստ սպասելի էր հատկապես հոկտեմբերի 6-ին ԲՀԿ-ի քաղխորհրդի նիստում Գագիկ Ծառուկյանի ելույթից հետո: Այդ նիստում Գագիկ Ծառուկյանը նշել էր «դանդաղ շտապելու» իր որոշման մասին՝ ասելով՝ «չպետք է շտապել և չպետք է սխալվել»։
Դեռևս 2011 թվականի փետրվարի 17-ին, երբ ստորագրվեց կոալիցիոն հուշագիրը, ու դրանից ընդամենը օրեր առաջ Սերժ Սարգսյանին ընդդիմացող ԲՀԿ-ն ստորագրեց նախագահական ընտրությանը նրան սատարելու թուղթը, ԲՀԿ նախագահ Գագիկ Ծառուկյանը բազմաթիվ հարցերին ի պատասխան` նշեց, որ երկիրը արտաքին լուրջ մարտահրավերների առաջ է, և դրա համար էլ ինքը ստորագրել է Սերժ Սարգսյանին սատարելու հուշագիրը:
Հետո Գագիկ Ծառուկյանը կրկին սկսեց ընդդիմանալ Սերժ Սարգսյանին, ինչը նշանակում է կամ ավելի շուտ հիմք է տալիս ենթադրելու, որ այդ արտաքին մարտահրավերները, որոնց մասին 2011-ի փետրվարին խոսում էր Գագիկ Ծառուկյանը, այլևս չկան: Ահա այսպիսի մի անհասկանալի իրավիճակում է ներկայումս հայտնվել ԲՀԿ առաջնորդը, որից փորձում են, այսպես ասած, միասնական կամ հզոր թեկնածու ստանալ ոչ միայն ինքը՝ Ծառուկյանը ԲՀԿ-ում, այլև Հայ ազգային կոնգրեսում, ՀՅԴ-ում և, միգուցե, «Ժառանգություն»-ում: Եվ այս թեկնածուն ենթադրվում է, որ պետք է պայքարի Սերժ Սարգսյանի և նրա իշխանության դեմ: Թե որքանով կարելի է այս պարադոքսը համարել պայքար` երևի թե այդ պայքարի առաջամարտիկները երբևէ հանգամանալից կբացատրեն հասարակությանը:
Սակայն այստեղ մի հարց է ծագում, որի պատասխանը շատ էական է առաջիկա զարգացումների համար: Ի՞նչ է անելու Գագիկ Ծառուկյանը, եթե վաղը Սերժ Սարգսյանը արտաքին մարտահրավերների շանտաժով, ինչու չէ՝ Ծառուկյանին և նրա շրջապատին ներքին տարատեսական տնտեսական լուրջ ճնշումներով ստիպի իր հանրահավաքային հուժկու պայքարը հետաձգել իր համար ցանկալի ժամանակաշրջան: Գագիկ Ծառուկյանը 2011-ի բացատրությամբ հանդերձ` համաձայնելո՞ւ է Սերժ Սարգսյանի այդ որոշմանը, թե՞ այս անգամ հրաժարվելու է:
Ցանկացած ընտրություններում Ծառուկյանի նման մրցակիցը իսկական նվեր է ոչ միայն Սերժ Սարգսյանի, այլև ցանկացած մեկի համար, ով պատրաստվում է վերարտադրվել անօրինական մեթոդներով: Բանն այն է, որ Գագիկ Ծառուկյանն այդ ամենը լեգիտիմացնելու իդեալական թեկնածու է: Պարզապես այս անգամ լեգիտիմության «հուշագիրը» կստորագրվի այն ժամանակ, երբ դա պետք լինի իշխանությանն ու, որքան էլ պարադոքսալ հնչի, անձամբ Սերժ Սարգսյանին:
Լուսանկարը՝ Photolure-ի
