Քրդական ինքնապաշտպանության ուժերը սիրիական Քոբանի քաղաքում (Այն էլ-Արաբ) հակահարձակման են անցել և ԴԱԻՇ («Իրաքի և Շամի իսլամական պետություն») կազմակերպության գրոհայիններից ազատագրել մի քանի շրջաններ: Այս մասին գրում է TASS-ը՝ վկայակոչելով Քրդական դեմոկրատական միություն կուսակցության պաշտոնական ներկայացուցիչ Բուլաթ Ջանին:
Վերջինս հայտնել է, որ քուրդ աշխարհազորայինները վերահսկողություն են սահմանել Շաիրի ռազմավարական նշանակություն ունեցող բարձունքի նկատմամբ և առաջ են շարժվում հարավարևելյան ուղղությամբ: Ծայրահեղականների դեմ թեժ մարտեր են ընթանում Էս-Սինաա թաղամասում, Թել փողոցում և ինքնապաշտպանության ուժերի շտաբի մերձակայքում:
Նշվում է նաև, որ քրդական զորքերին հաջողվել է վերահսկողություն հաստատել Իրաքի հյուսիսում գտնվող Զումար քաղաքի և մերձակայքում գտնվող գյուղերի նկատմամբ, որոնք զավթել էին գրոհայինները:
Չնայած ծայրահեղականների խիստ դիմադրությանը՝ շաբաթ առավոտյան փեշմերգաներին հաջողվել է առաջ շարժվել:
