Հունաստանի փոխվարչապետ, ԱԳՆ ղեկավար Էվանգելոս Վենիզելոսը հայտարարել է, որ ԵՄ-ն հստակ ազդանշան է ուղարկել Անկարային՝ Թուրքիան պետք է հարգի միջազգային իրավունքը, և եթե նա մտադիր է անդամակցել ԵՄ-ին, պետք է ճանաչի Եվրոպական համայնքի բոլոր անդամ երկրները: Կիպրոսյան կարգավորման վերաբերյալ Վենիզելոսի հայտարարությունն ուրբաթ օրը տարածել է Հունաստանի ԱԳՆ-ն՝ հայտնում է Ria Novosti-ն:
Հունաստանը հինգշաբթի և ուրբաթ Բրյուսելում ԵՄ-ի և եվրոգոտու գագաթնաժողովում ներկայացնում է Կիպրոսի շահերը, քանի որ Կիպրոսի նախագահ Նիկոս Անաստասիադիսը հոսպիտալացվել է:
Անաստասիադիսը պատրաստվում էր գագաթնաժողովի ժամանակ բողոք ներկայացնել Թուրքիայի դեմ՝ պահանջելով դատապարտել Թուրքիայի գործողությունները, որն օգտակար հանածոների սեյսմիկ ուսումնասիրություն է սկսել Կիպրոսի բացառիկ տնտեսական գոտում:
Թուրքիան հայտարարում է, որ չի ճանաչում Կիպրոս պետության գոյությունը:
«Չնայած Կիպրոսի նախագահ Անաստասիադիսի բացակայությանը՝ Եվրոպական Խորհուրդը, ես կասեի՝ ընդհանուր ԵՄ-ն, շատ հստակ ազդանշան է ուղարկել Թուրքիային՝ ազդանշան ամբողջ միջազգային հանրության կողմից՝ որ ինքը պահանջում է հարգել միջազգային իրավունքը, ինքնիշխան իրավունքները և Կիպրոսի միջազգային իրավական սուբյեկտ լինելը: Երկիրը չի կարող ձգտել դառնալու ԵՄ անդամ պետություն՝ չճանաչելով Միության անդամ 28 երկրները, այսինքն՝ նաև Կիպրոսը»,- ասվում է Վենիզելոսի հայտարարության մեջ:
