«Ազատություն» կուսակցության նախագահ Հրանտ Բագրատյանի հրավերն ընդունելով` երեկ այդ կուսակցության համագումարին մասնակցել է ՀԱԿ անդամ, «Սասուն» ջոկատի հրամանատար Սասուն Միքայելյանը, որը շաբաթ օրը տեղի ունեցած ՀՀՇ 17-րդ համագումարից բացակայել էր: Երեկ լրագրողների հետ զրույցում Միքայելյան իր բացակայությունը մեկնաբանել է առողջական խնդիրներով:
«Հայկական ժամանակ»-ն արձանագրում է, որ Միքայելյանն ուրբաթ օրը ներկա էր «Հանրապետություն» կուսակցության համագումարին, շաբաթ ՀՀՇ համագումարին չէր մասնակցում, իսկ երկուշաբթի ընդունել էր Բագրատյանի հրավերը: «Սասուն» ջոկատի հրամանատարը կոնկրետ հարցին դուք ՀԱԿ անդա՞մ եք, երեկ տվել է ոչ կոնկրետ պատասխան. «Համաժողովրդական շարժում է եղել, ես էդ շարժման մեջ եմ: Ու լինելու եմ էն հրապարակում, որտեղ իմ ժողովուրդն է»:
