Չինաստանի մայրաքաղաք Պեկինում սկսվել են սաստիկ ցրտեր: Ինչպես հաղորդում է ITAR-TASS-ը՝ վկայակոչելով Պեկինի օդերևութաբանական կայաններից մեկի տվյալները, այսօր առավոտյան օդի ջերմաստիճանը եղել է -14 աստիճան՝ ըստ Ցելսիուսի, ինչը ռեկորդային ջերմաստիճան է վերջին 10 տարիների ընթացքում:
Անցած հանգստյան օրերն իսկական փորձություն են եղել քաղաքի կոմունալ ծառայությունների համար: Քաղաքային իշխանությունները քաղաքում աշխատող հյուրանոցներին, ռեստորաններին և կառավարական շենքերին կարգադրել են իջեցնել տարածքների ջեռուցման պահանջարկը, որպեսզի կոմունալ ծառայությունները կարողանան ջեռուցման համակարգի աշխատանքն ուղղել բնակարանները տաքացնելու համար: Վերջին երկու օրերին կառավարական հաստատություններում օդի ջերմաստիճանը եղել է +5 աստիճան՝ ըստ Ցելսիուսի:
Օդերևութաբանների կանխատեսումների համաձայն՝ ջերմաստիճանն աստիճանաբար կբարձրանա մոտակա մի քանի օրերի ընթացքում:
Սաստիկ ցրտեր են սկսվել նաև Չինաստանի մի շարք այլ
շրջաններում, մասնավորապես երկրի հյուսիսում և հյուսիս-արևմուտքում: Վերջին երկու օրերին Ներքին Մոնղոլիայի ինքնավար շրջանի մի քանի բնակավայրերում օդի ջերմաստիճանը եղել է -40 աստիճան՝ ըստ Ցելսիուսի սանդղակի: Երկրի հյուսիս-արևելյան հատվածում մոլեգնում է ուժեղ ձնաբուք:
