Հայաստանի Հանրապետությունում արգելված է եղևնիների և սոճիների հատումն ու վաճառքը: Մայրաքաղաքում վաճառքի հանված եղևնիներն ու սոճիները հանրապետություն են ներմուծվում Գերմանիայից: Յուրաքանչյուր ներմուծված ծառի համար վաճառքի թույլտվությունն էլ տալիս է ՀՀ բնապահպանության նախարարությունը: «Արմենպրես»-ին բնապահպանության նախարարության Կենսառեսուրսների կառավարման գործակալությունից տեղեկացրել են, որ 2012 թվականին Գերմանիայի Դաշնային Հանրապետությունից Հայաստան է ներմուծվել 260 հատ կեռիկավոր կամ արծաթափայլ և 60 կովկասյան տեսակի եղևնի: Մինչդեռ 2011 թվականին Գերմանիայից մեր երկիր էր ներմուծվել ընդամենը 150 հատ կեռիկավոր տեսակի եղևնի:
Ամանորի նախօրեին որպես կանոն արձանագրվում են սոճիների հատման դեպքեր: Նմանատիպ դեպք, օրինակ, գրանցվել էր 2011 թվականին: Հայաստանի գլխավոր անտառապետ Ռուբեն Պետրոսյանը հավաստիացրեց, որ այս տարի «Հայանտառ» ՊՈԱԿ-ի ենթակայության տակ գտնվող տարածքներում Ամանորին ընդառաջ սոճու հատումներ չեն գրանցվել: «Այս տարի ոչ միայն Ամանորին ընդառաջ, այլև ընդհանրապես ծառերի հատման դեպքեր չեն գրանցվել: Վերահսկողությունը մեր կողմից բավական խստացվել է»,-ասաց գլխավոր անտառապետը: Իսկ այն հարցին, թե որքա՞ն տուգանք է նախատեսվում հատված սոճու կամ եղևնու դեպքում, Պետրոսյանը նշեց, որ տուգանքի չափը կախված է տրամագծից, և նրանից` բնական է արդյոք եղևնին, թե արհեստական: «Բնականի դեպքում տուգանքի չափը եռապատկվում է»,-ասել է նա:
Հայաստանի սպառողների միության նախագահ Արմեն Պողոսյանն էլ փաստել է, որ այս տարի հատկապես աճել են արհեստական եղևնիների գները: «Բնական եղևնիները վաճառվում են 20 հազար դրամից սկսած, արհեստականներն էլ տասը հազար: Սրանք ամենամատչելիներն են և այնքան էլ եղևնու նման չեն: Նորմալ բնական եղևնիների գները սկսվում են 50 հազարից, իսկ միջին քաղաքացու գրպանին այս թվերը հասու չեն»,-ասել է նա:
