«Դժբախտաբար, Սփյուռքի աջակցությունը Հայաստանին միայն նյութական է, մինչդեռ կա հսկայական ներուժ»,- «Առաջին լրատվական»-ի հետ զրույցում այս մասին ասաց Կիպրոսի «Ազատ խոսք» համացանցային թերթի խմբագիր Երան Գույումճյանն՝ անդրադառնալով Հայաստան-Սփյուռք կապին ու առկա խնդիրներին:
Նա նշեց, որ Հայաստանն ու Սփյուռքը ազգային առաջնահերթությունների շուրջ միակամ են և միասնական: Ըստ նրա՝ Հայաստան-Սփյուռք սերտացման համար պետք է վերակազմակերպել Սփյուռքը և Հայաստանը, որովհետև Սփյուռքը բաղկացած չէ միայն կուսակցական ղեկավարներից կամ հոգևոր, աշխարհիկ պետերից, այլ հսկա զանգված է, որը ներկայացված չէ: «Ինչու չստեղծենք ներկայացուցչական մարմին, որը կարողանա նաև Հայ Դատի, Հայաստանին օգնելու ուղղությամբ աշխատի, օգտակար լինի հայապահպանման իմաստով և ամեն այս ուղղություններով»,- ասաց նա: Երան Գույումճյանը նաև նշեց, որ Սփյուռքը Հայաստանին առայժմ միայն նյութական աջակցություն է ցուցաբերում և գաղափարներով՝ մամուլում, բայց թերթերն էլ ուղղություն ունեն, քանի որ կուսակցական են: « Դժբախտաբար, առայժմ միայն նյութական է, մինչդեռ մենք ունենք հսկայական փորձ ստեղծագործական, գիտական մտքի, տարբեր հմտությունների: Մենք նաև կարող էինք մեզ բարեկամաբար տրամադրված պետությունների շարքն ավելացնել, ինչն անում ենք, բայց կարող ենք ավելին անել, ավելի շատ անձեր գտնենք, որոնք դրականորեն են տրամադրված թե Հայաստանի, թե Հայ Դատի նկատմամբ»,- ասաց նա:
Հարցին, թե ի՞նչ է ակնկալում Հայաստան պետությունից ՀՀ սահմաններից դուրս ապրող հայը, այն, ինչ արվում է, բավարա՞ր է, պատասխանեց, որ Սփյուռքը հոգի է իր կարոտով, իր մաքառումով, տառապանքներով, և հայապահպանման ուղղությամբ աշխատանքն ավելի ամուր պետք է լինի: «Եթե Սփյուռքը կորցնենք, հայության մեծ մասը կկորցնենք, և սա ահավոր կորուստ կլինի ամբողջ ազգի համար: Պետք է ավելի սերտանան, իսկ դրա համար վերակազմակերպումն անհրաժեշտ է»,- ասաց նա:
Երան Գույումճյանի հետ ամբողջական զրույցը՝ տեսանյութում:
