Լեհաստանի ԱԳ նախարար Ռոդիսլավ Սիկորսկին ԶԼՄ-ների միջոցով դիմել է ՌԴ նախագահ Վլադիմիր Պուտինին իրեն «այն խանութի» հասցեն տրամադրելու խնդրանքով, որտեղ կարելի է ծանր հրետանի ձեռք բերել, ինչպիսին Ուկրաինայի արևելքում օգտագործում են ռուսամետ ահաբեիչները:
Այսպիսի հայտարարությամբ Սիկորսկին հանդես է եկել հուլիսի 28-ին Վարշավայում կայացած մամլո կոնֆերանսին:
«Ղրիմում (իրադարձություններից հետո) նախագահ Վլադիմիր Պուտինը ասել է, որ «կանաչ մարդուկները» իր զինվորները չեն: Սակայն հետագայում խոստովանել է, որ իրենն են: Նա ասել է, այն տեխնիկան, որը նրանք օգտագործում են, կարելի է գնել Ուկրաինայի կամ Ռուսաստանի խանութներում: Խնդրում եմ ցույց տալ ինձ այն խանութը, որտեղ կարելի է «Բուկ», Т-64 հրասայլ, հակաօդային պաշտպանության «Ստրելա» համակարգ գնել»,- Ռուսաստանի նախագահին հեռակա դիմել է լեհ նախարարը:
Լեհաստանի ԱԳ նախարարը նկատել է, որ ռուսական իշխանությունների ներկայացուցիչների հայտարարությունները «ակնհայտ ապացույցներին» դեմ են, այդ թվում նաև ուկրաինական ուժայիններին ռուս զինվորականների կողմից գնդակոծմանը:
Նա խիստ քննադատել է նաև իր ռուս գործընկեր Սերգեյ Լավրովին, ով մինչ ադ լրագրողների մոտ հերքել է Ռուսաստանի տարածքից Ուկրաինան գնդակոծելու փաստացի ապացույցները: Այս մասին է ասվում Սիկորսկու ելույթում, որը հրապարակել է TVN24 հեռուստաալիքը:
Սիկորսկին ավելացրել է, որ ի պատասխան մալայզիական խփված ինքնաթիռի, Լեհաստանը կողմ է Ռուսաստանի դեմ կիրառվող պատժամիջոցներին:
«Դրա պատասխանատվությունը կրում է Ռուսաստանի դաշնությունը, որը մատակարարել, և ցավոք, շարունակում է անջատողականներին զենք մատակարարել, որոնց շարքերում ղեկավար դերերը Ռուսաստանի քաղաքացիներ են զբաղեցնում»,- ասել է նախարարը:
