News Georgia-ի փոխանցմամբ՝ ԱՄՆ պետքարտուղար Հիլարի Քլինթոնը Վաշինգտոնում Վրաստանի արտգործնախարար Մայա Պանջիկիձեի հետ հանդիպումից առաջ հերթական անգամ աջակցություն է հայտնել Վրաստանի ժողովրդավարական գործընթացներին՝ ընդգծելով, որ պետք է ապահովել թափանցիկության սկզբունքը՝ կապված վերջին հետաքննությունների հետ:
Պանջիկիձեի ու Քլինթոնի հանդիպումը տևել է 45 րոպե: Հանդիպման ժամանակ Քլինթոնը հայտարարել է. «Վրաստանում անցկացված խորհրդարանական ընտրությունները մեկ քայլ առաջ էին դեպի ժողովրդավարություն: Մենք աջակցում ենք իշխանության խաղաղ հանձնման գործընթացը, ինչը տեղի ունեցավ ընտրություններից հետո:
Հուսով ենք, որ այն անձանց նկատմամբ, ովքեր հնարավոր է՝ օրենք խախտած լինեն, հետաքննության գործընթացը թափանցիկ է և համապատասխանում է օրենքին: ԱՄՆ-ը Վրաստանին աջակցում է ոչ միայն երկրի ներսում: Մենք Վրաստանի հետ աշխատում ենք նաև Աֆղանստանի հարցերի շուրջ և ՆԱՏՕ-Վրաստան հանձնաժողովի շրջանակներում»:
Պանջիկիձեն իր հերթին շնորհակալություն է հայտնել Քլինթոնին՝ ընտրություններից կարճ ժամանակ անց ԱՄՆ հրավիրելու համար: Պանջիկիձեն հավելել է, որ իրենք հպարտ են, որ ԱՄՆ-ը Վրաստանի ռազմավարական գործընկերն է:
Պանջիկիձեն Վրաստանի ԱԳՆ-ի պաշտոնում իր առաջին ամերիկյան այցից հետո մեկնելու է Մեքսիկա, ապա Բրյուսել և Դուբլին, որտեղից էլ դեկտեմբերի 8-ին վերադառնալու է Վրաստան:
