Թուրքական Milliyet թերթի փոխանցմամբ` Թուրքիայի վարչապետ Ռեջեփ Էրդողանը քննադատել է «Հիանալի դար» հանրահայտ հեռուստասերիալի հեղինակներին՝ սուլթան Սուլեյմանին յուրովի ներկայացնելու համար: Էրդողանն անգամ հայտարարել է, որ ակնկալում է, որ դատական իշխանությունները համապատասխան միջոցներ կձեռնարկեն ֆիլմի հեղինակների նկատմամբ.
«Մենք այդպիսի սուլթան չենք ունեցել, մենք չենք ճանաչում այդպիսի Սուլեյման սուլթանի: Իր կյանքի 30 տարիներին նա ձիու վրայից չի իջել և ոչ թե շարունակ նստել է նստավայրում, ինչպես որ մեզ ցուցադրում են սերիալում: Ես դատապարտում եմ այդ սերիալի հեղինակներին ու հեռուստաալիքի տերերին: Ես սպասում եմ, որ նրանց նկատմամբ որոշում կլինի նաև օրենքի կողմից»:
Հեռուստասերիալում պատմվում է սուլթան Սուլեյման Փառահեղի (Օրենսդիր) և նրա սիրուհու՝ Ռոքսոլանայի հարաբերությունների մասին: Թուրքերի շրջանում շատերը նույնպես քննադատում են այս սերիալը, քանի որ դրանում ցույց է տրվում, թե սուլթանն ավելի շատ ժամանակ է հատկացնում իր հարեմին և ներնստավայրային խնդիրներին, քան՝ արշավանքներին:
Հիշեցնենք, որ սուլթան Սուլեյման 1-ին Փառահեղը (1520-1566) համարվում է ամենաերկար ժամանակով կառավարած և ամենաշատ արշավանքներ իրականացրած օսմանյան սուլթանը: Ընդհանուր առմամբ, իր կառավարման մոտ 46 տարիներին Սուլեյմանը ձեռնարկել է 13 արշավանք, ինչը հանգեցրել է նրան, որ նա Օսմանյան կայսրության տարածքը հասցրել է 14,893,000 քառակուսի կիլոմետրի: Մինչդեռ Սելիմ 1-ին Ահեղից (1512-1520) Սուլեյման Փառահեղի ժառանգություն ստացած կայսրության տարածքը կազմում էր 6,557,000 քառակուսի կիլոմետր:
Սելիմ Ահեղին իր հերթին հաջողվել էր 8 տարվա ընթացքում պետության տարածքը մեծացնել 2.5 անգամ՝ 2,375,000 քառակուսի կիլոմետրից հասցնելով 6,557,000 կիլոմետր քառակուսու, որից 1,702,000 քառակուսի կիլոմետրը գտնվում էր Եվրոպայում, 1,905,000 քառակուսի կիլոմետրը՝ Ասիայում և 2,905,000 քառակուսի կիլոմետրը՝ Աֆրիկայում:
