Մեքսիկայի նոր նախագահ Էնրիկե Պենյա Նյետոյի երդմնակալության արարողությունը, որը տեղի կունենա դեկտեմբերի 1-ին, կուղեկցվի զանգվածային բողոքի ցույցերով: Այս մասին հայտնում է RIA Novosti-ն՝ հղում անելով ձախ ուժերի նախկին թեկնածու Անդրես Մանուել Լոպես Օբրադորին:
Լոպես Օբրադորն այդպես էլ չի ճանաչել 2012-ի հուլիսի 1-ին կայացած քվեարկության արդյունքները՝ Ինստիտուցիոնալ հեղափոխական կուսակցության հաղթող ներկայացուցչին մեղադրելով ընտրողներին զանգվածաբար կաշառելու մեջ:
Twitter-ի իր միկրոբլոգում Լոպես Օբրադորը գրել էր, որ բողոքի ակցիաներ տեղի կունենան բոլոր նահանգների վարչական կենտրոններում և կսկսվեն միաժամանակ դեկտեմբերի 1-ի առավոտյան ժամը 11:00-ից: Հենց այդ ժամանակ էլ նշանակված է երդմնակալության մեկնարկը:
Մեխիկոյում բողոքի ակցիան տեղի կունենա քաղաքի խորհրդանիշ հանդիսացող «Անկախության հրեշտակ» հուշարձանի մոտ:
Լոպես Օբրադորը առաջին անգամ չէ բողոքի նման ակցիա կազմակերպում: Ներկայիս նախագահ Ֆելիպե Կալդերոնի ընտրվելուց հետո (2006թ.) ձախ թեկնածուն դարձյալ հրաժարվել էր ճանաչել իր պարտությունը և իր կողմնակիցներին փողոց էր դուրս բերել:
