Հանրապետական սենատոր Ջոն Մաքքեյնը, որը 2008 թվականին նախագահական ընտրապայքարում եղել է Բարաք Օբամայի մրցակիցը, Die Zeit-ի հետ հարցազրույցում` Գալիֆակսում (Կանադա) Անվտանգության հարցերով ամենամյա ֆորումի ժամանակ, հայտարարել է, որ ԱՄՆ-ը ոչ մի դեպքում չպետք է անմասն մնա իսրայելցիների և Գազան վերահսկող ՀԱՄԱՍ շարժման հակամարտությունից: Մաքքեյնի խոսքով՝ ԱՄՆ-ը «պետք է ցույց տա իր առաջնորդությունը և փորձի լիցքաթափել վտանգավոր իրադրությունը»: «Տարածաշրջանում բոլորը հույսը դնում են Ամերիկայի վրա»,- հայտարարել է նա:
Մաքքեյնն ընդգծել է, որ իրավիճակը փոխվել է, քանի որ մինչև վերջերս Եգիպտոսի կառավարիչները, որոնք մեծ ազդեցություն ունեին պաղեստինցիների վրա, «կայունության խարիսխ» էին, սակայն նախագահ Մուրսին ստիպված է հետևել հավասարակշռությանը՝ Եգիպտոսի ու Իսրայելի միջև խաղաղության պայմանագիրը չխախտելու խոստման և իր կողմնակիցներին «Մուսուլման եղբայրներին» ուշադրություն դարձնելու անհրաժեշտության միջև: Վերջիններս համակրանք չեն տածում Իսրայելի հանդեպ:
Մաքքեյնը նաև նշել է, որ շնորհիվ «Երկաթե գմբեթ» հակաօդային պաշտպանության համակարգի, որը կառուցվել է ԱՄՆ-ի օգնությամբ, իսրայելցիները կարող են օդում կործանել պաղեստինյան հրթիռները: Դա հաջողվում է դեպքերի 90 տոկոսում: «Այլապես իսրայելական բանակը վաղուց կմտներ Գազայի հատված»,- ասել է Մաքքեյնը և նշել, որ ցամաքային օպերացիային ամերիկացի ժողովուրդը հավանություն չի տա, քանի որ հոգնել է պատերազմներից:
Մաքքեյնը նշել է, որ ԱՄՆ-ի անվտանգության համար ամենամեծ սպառնալիքը համարում է տնտեսական ճգնաժամը:
