«Շատ-շատ մեր մերձավորներին փորձելու ենք ցավացնել, նեղացնել, բայց մենք գնալու ենք այդ քայլին, քանի որ այլընտրանք մենք չունենք: Դա պետք է բոլորը հասկանան, իմ մերձավորները: Ես ինձանից եմ սկսելու և դա լինելու է սկզբունքային»,- վարչապետ նշանակվելուց հետո հայտարարեց Հովիկ Աբրահամյանը՝ նախաձեռնելով գործարարներին օրենքի դաշտ բերելու, ստվերից դուրս բերելու գործընթացը: Վարչապետի այս հայտարարության հետքերով մենք այցելեցինք վերջինիս ծննդավայր՝ Մխչյան գյուղ, որտեղ տեղակայված է նրան ու նրա եղբորը՝ Ջոնիկ Աբրահամյանին պատկանող «Արտաշատ-Վինկոն» գինու գործարանը, պարզելու Հովիկ Աբրահամյանի կողմից արդեն իսկ հրահանգ իջեցվե՞լ է, որ պետք է օրինական դաշտում աշխատեն, ստվերից դուրս գան: Սակայն մեզ գործարանի դռներից ներս չթողեցին: Տնօրեն Պապիկյանն ասաց, որ առանց Աբրահամյանի՝ ոչնչի ու ոչ մի հարցի չի կարող պատասխանել: Առանց Հովի՞կ Աբրահամյանի՝ փորձեցինք հստակեցնել: «Չէ, Հովիկ Աբրահամյանը նման հարցերով չի զբաղվում, խոսքը Ջոնիկ Աբրահամյանի մասին է»,-ասաց տնօրենը: Վերջինից կրկին փորձեցինք հստակեցնել՝ արդեն իսկ օրենքո՞վ են աշխատում: «Ես կրկնում եմ, որ ոչ մի հարցի չեմ կարող պատասխանել մինչև չլինի պարոն Աբրահամյանի համաձայնությունը»: Իսկ վերջինի հետ համաձայնեցնել, բնականաբար, չստացվեց: Շատ զբաղված էր և անգամ հեռախոսին պատասխանելու ժամանակ չուներ: