Սերժ Սարգսյանի մտայնությունը, թե Հայաստանի Մաքսային միությանն անդամակցելը նպաստում է ԼՂ կարգավորմանը, սխալ է: «Առաջին լրատվական»-ի հետ զրույցում այս մասին ասաց Քաղաքական և միջազգային հարաբերությունների հայկական կենտրոնի տնօրեն, քաղաքագետ Աղասի Ենոքյանն՝ անդրադառնալով այսօր ՀՀ նախագահ Սերժ Սարգսյանի մեկնաբանությանը, որը վերաբերում էր Աստանայում Ղազախստանի նախագահ Նուրսուլթան Նազարբաևի ներկայացրած պայմաններին ՀՀ ԵՏՄ անդամակցության վերաբերյալ:
Աղասի Ենոքյանն ասաց, որ դիտարկումը, թե Մաքսային միությանն անդամակցությունը նպաստում է Լեռնային Ղարաբաղի խնդրի կարգավորմանը, ճշմարտությանը չի համապատասխանում: Ըստ նրա՝ ամենայն հավանականությամբ, մնում ենք հին դիսկուրսի մեջ, այն է՝ ԼՂ հակամարտության կարգավորումը պայմանավորված է Ռուսաստանով և լուծման բանալին Ռուսաստանի պոչին, Ռուսաստանի ազդեցության գոտում մնալն է, և Սերժ Սարգսյանը կրկին մտայնության մեջ է, թե ՀՀ ՄՄ և ԵՏՄ անդամակցությունը նպաստում է Ռուսաստանի ազդեցության ոլորտում մնալուն և դիրքեր ամրապնդելուն:
«Ես կարծում եմ, որ դա իրականության հետ կապ չունի, թե դա է խնդրի կարգավորման համար նպաստավոր: Ղարաբաղի խնդիրն իսկապես ԵԱՀԿ Մինսկի խմբի շրջանակում է կարգավորվում և ոչ ՄՄ-ում, այդ առումով դիտարկումները ճիշտ են, բայց ՄՄ-ում այդ հակամարտությունը ոչ թե կարգավորվում է, այլ խոչընդոտվում է: Ռուսաստանի հետ ցանկացած ինտեգրացիոն պրոյեկտ բարդացնում է ԼՂ խնդրի լուծումը, որովհետև ՌԴ-ն ԼՂ-ի հարցում ունի իր կոնկրետ նպատակն ու իր կոնկրետ խնդիրը, և դա Ադրբեջանի կամ Ղարաբաղի տարածքում ռուսական զորքեր տեղակայելն է: Սա կապ չունի ԼՂ կարգավորման հետ, դա ՌԴ-ի ներքին խնդիրն ու շահն է»,- ասաց վերլուծաբանը: Վերջինիս կարծիքով՝ հնարավոր է խուսափել ՀՀ-ի ու ԼՂ-ի միջև մաքսային անցակետի տեղակայման հարցից, և Հայաստանը, այնուամենայնիվ, կմտնի ՄՄ երկրորդական կարգավիճակով, քանի որ արդեն իսկ այդ պրոյեկտների հիմնադիր անդամ չէ:
«Ուստի կլինի այդ միությունում որոշակիորեն լիազորությունները զիջած կարգավիճակում: Այստեղ խնդիրը Հայաստանին ՄՄ մտցնելը չէ, ՌԴ-ն երկու խնդիր է լուծում. առաջինն այն է, որ Հայաստանը չմիանա եվրոպական ինտեգրացիոն պրոյեկտներին, երկրորդը՝ Ռուսաստանն իր ճամբարում առկա պետությունների ցանկում ունենա նաև Հայաստանին»,- այսպես ավարտեց իր խոսքը Աղասի Ենոքյանը:
Հիշեցնենք, որ այսօր ՀՀ նախագահ, Հայաստանի Հանրապետական կուսակցության (ՀՀԿ) նախագահ Սերժ Սարգսյանը Ծաղկաձորում հանդիպում է ունեցել ՀՀԿ երիտասարդական կազմակերպության հերթական հաշվետու հավաքի մասնակիցների հետ: Երիտասարդ հանրապետականներից մեկը Սերժ Սարգսյանից հետաքրքրվել է, թե ի՞նչ կարծիք ունի նա Եվրասիական տնտեսական միությանը Հայաստանի միանալու գործընթացի վերաբերյալ՝ նկատի առնելով Աստանայում նախօրեին Եվրասիական տնտեսական բարձրագույն խորհրդի ընդլայնված կազմով նիստում Ղազախստանի նախագահ Նուրսուլթան Նազարբաևի կողմից ընթերցված Ադրբեջանի նախագահի նամակը՝ կապված միությանն անդամակցելու դեպքում Հայաստանի սահմանների և ԼՂՀ-ն ևս այդ սահմաններում ներառելու խնդրի հետ:
«Նախ պետք է ասեմ, որ որևէ խոչընդոտ չկա Հայաստանի Մաքսային միությանն անդամակցելու մասով: Եվ երբ մենք այնտեղ ասում ենք, որ 2-3 հարց կա, այդ 2-3 հարցը զուտ տեխնիկական նշանակության հարցեր են և վերաբերում են մեր առևտրային հարաբերություններին: Ինչ վերաբերում է Նազարբաևի հնչեցրածին՝ նախ այն գլխից սխալ է սահմանների մասին խոսելը: Ի՞նչ սահմանների մասին ենք խոսում: Ղարաբաղի խնդիրը Մաքսային միությունում չի լուծվում: Իսկ ո՞վ է ասել, որ մենք Ղարաբաղով ենք մտնելու Մաքսային միություն: Այդպիսի բան չի եղել և չի էլ կարող լինել, որովհետև Ղարաբաղը, գոնե մեր օրենսդրությամբ, գոնե մեր պատկերացումներով՝ Հայաստանի մաս չէ այսօր կազմում: Իսկ որ Մաքսային միությանն անդամակցելը նպաստում է Լեռնային Ղարաբաղի խնդրի լուծմանը, սա միանշանակ է: Իհարկե, Նազարբաևի հնչեցրածը տհաճ էր, բայց դա որևէ վնաս չի կարող մեզ տալ»,- պատասխանել է նախագահ Սերժ Սարգսյանը:
