Երգչուհի Մադոննան իրեն հասցված վիրավորանքի համար պատասխանել է Մալավիի նախագահ Ջոյս Բանդային՝ հայտարարելով, որ Աֆրիկայի հարավի ամենաաղքատ երկրներից մեկում մեծ կոռուպցիա կա, և կյանքը չի լավանում, հայտնում է ITAR-TASS-ը:
«Ես շատ եմ նեղսրտել, որ նախագահի գործողությունների պատճառով Մալավիի բնակիչները շարունակում են տառապել: Իմ բարեգործական գործունեությունը ի հայտ բերեց Մալավիի կառավարության մեջ կոռուպցիայի ողջ խորությունը: Ես փոփոխությունների հույս ունեմ, քանի որ մալավիցիները լավագույնին են արժանի»,- ասվում է երգչուհու հայտարարության մեջ:
Անցած տարի Մադոննան, որը երկու երեխա է որդեգրել Մալավիում, գնացել է իր միջոցներով երկրում կառուցված 10 տարրական դպրոցները ստուգելու: Սակայն կառավարությունը հայտարարել է, որ գումարով կահավորվել է մի քանի նոր դասասենյակ կամ վերանորոգվել են հին դասասենյակները: «Որտե՞ղ են այդ 10 դպրոցները: Պետք չէ ստել ամբողջ աշխարհին»,- նշվում է երգչուհու հայտարարության մեջ:
Որպես հետևանք՝ Մալավիից մեկնելիս հրաժարվել են Մադոննային վիպ-ծառայություն մատուցել՝ թողնելով, որ օդանավակայանում սպասի ընդհանուր հերթի մեջ և ստիպելով, որ անձնական ստուգում անցնի:
Երգչուհին հայտարարել է, որ իր հանդեպ վերաբերմունքը փոխվել է, երբ ինքը Մալավիի նախագահի փոքր քրոջը հեռացրել է իր «Զարգացնենք Մալավին» հիմադրամի կառավարումից՝ 3,8 մլն դոլարը ոչ նպատակային օգտագործելու պատճառով:
Մադոննան ափսոսանք է հայտնել, որ նախագահ Ջոյս Բանդան «կանգնել է ստի ճանապարհին այն առնչությամբ, ինչ մենք արեցինք, և ես անձամբ ինչպես ինձ պահեցի Մալավի այցի ժամանակ»:
