«Ես տասն ավարտելուց մի «4» եմ ունեցել՝ երկրաչափությունից: Մնացածը բոլորը «5» են եղել»,- այսօր թիվ 119 ավագ դպրոցում, Վերջին զանգի միջոցառումից հետո պատասխանելով «Առաջին լրատվական»-ի հարցին, թե ինչ առաջադիմությամբ է սովորել և ավարտել դպրոցը, ասաց վարչապետ Հովիկ Աբրահամյանը: Նա դպրոցի շրջանավարտներին «պատգամեց լավ սովորել, լավ գիտելիքներ ձեռք բերել, քանի որ դա է ապագայի գրավականը: «Կյանքում նախագահ, նախարար, վարչապետ դառնալու համար երկու կարևոր բաղադրիչ կա. առաջինը դա գիտելիքն է, և հետո՝ կյանքի փորձը»,- ասաց Հովիկ Աբրահամյանը:
Նա իր ասածը հիմնավորեց իր օրինակով. «Ես ոչ մի բարեկամ չեմ ունեցել, որ պաշտոնյա է, ոչ մի բարեկամ չեմ ունեցել, որ ինձ աջակցել է, որ պաշտոններ գրավեմ: Դա իմ ջանքերի, չարչարանքի շնորհիվ է եղել: Եվ այսօր ես ուրախ եմ, որ մեր երկում մի վիճակ է ստեղծվել, որ էլ ծանոթները, բարեկամները չեն աջակցում, որ մարդիկ աշխատանք ստանան: Այսօր ամենակարևորը քաղաքացու գիտելիքն է: Եթե ունի գիտելիք, ունի ապագա և աշխատանք»:
