Վրաստանի խորհրդարանի խոսնակ Դավիդ Ուսուպաշվիլին մտադիր է լքել Հանրապետական կուսակցության ղեկավարի պաշտոնը: Ինչպես «Մաեստրո» հեռուստաընկերությանը հայտնել է Ուսուպաշվիլին, օրենքը նրան չի պարտադրում լքել խորհրդարանի նախագահի պաշտոնը, սակայն, նրա խոսքերով, այս երկու պաշտոններն անհնար է համատեղել:
«Անհնար է, որ խորհրդարանի խոսնակը կարողանա պատշաճ կերպով կուսակցություն ղեկավարել՝ հաշվի առնելով այն ռեժիմը, որով նա ստիպված է աշխատել, սակայն դա երկու-երեք օրում տեղի չի ունենա: Ընտրություններից հետո հանրապետականները ծրագրավորել են արտահերթ նիստ անցկացնել: Կուսակցական պաշտոնները ստիպված կլքեն ոչ միայն նախագահը, այլ նաև որոշ խորհրդականներ նույնպես: Ես, որպես կուսակցության նախագահ, վերջին անգամ եմ վերընտրվել, և մենք այս մասին նախօրոք հայտարարել էինք: Այնպես որ այս հարցը կուսակցությունում առկա էր անկախ նրանից՝ կհասնեի՞նք մենք հաջողության, թե՝ ոչ: Հիմա կարելի է արագացնել այդ գործընթացը: Ինչևէ, անգամ լքելով պաշտոնս, ես հանրապետական եմ մնում»,- հայտարարել է Ուսուպաշվիլին:
Նրա խոսքերով՝ կրթության փոխնախարար Դավիդ Զուրաբիշվիլին կուսակցության քարտուղարն է, և հավանաբար նա էլ չի կարողանա այդ պարտականությունները կատարել: Ինչ վերաբերում վերաինտեգրման հարցերով նախարար Զաքարեիշվիլիին, ապա նա հավանաբար կմնա ազգային հանձնաժողովի կազմում, քանի որ հանձնաժողովը երկու ամիսը մեկ է հավաքվում, և նախարարը կարող է դրան ժամանակ հատկացնել:
