Եգիպտական հեղափոխական շարժման երեք անդամներ հոկտեմբերի 30-ին դատարան բողոք են ներկայացրել պետության երեք գլխավոր ներկայացուցիչների` նախագահ Մուհամմեդ Մուրսիի, վարչապետ Հիշամ Քանդիլի և արտգործնախարար Մուհամմեդ Քամել Ամրայի դեմ:
Հայցվորները՝ «Եգիպտոսի հեղափոխական երիտասարդական միության» ներկայացուցիչներ Ամր Համեդը, Հիթամ Հաթիբը և Բադաուի Նագիլան, պնդում են, որ 1979 թ. Իսրայելի հետ կնքած խաղաղության պայմանագիրը վնաս է հասցնում Եգիպտոսի ժողովրդի շահերին, և պետք է փոփոխվի կամ էլ ընդհանրապես չեղյալ հայտարարվի:
Միության անդամները պնդում են, որ հեղափոխությունը «պարտադրում» է ռեժիմին վերանայել, իսկ անհրաժեշտության դեպքում նաև չեղյալ հայտարարել միջազգային համաձայնագիրը:
Ամր Համեդը հայտարարել է, որ ռազմական համագործակցության վերաբերյալ հատվածը սահմանափակում է եգիպտական ռազմական ներկայությունը Սինայում, ինչը նպաստում է այնտեղ ջիհադի, սալաֆիզմի և ահաբեկչության ծաղկմանը: Գործի վերաբերյալ վերջնական որոշումը կայացվելու է դեկտեմբերի 18-ին:
Միաժամանակ, եգիպտական լրատվամիջոցները հաղորդում են, որ Մուրսիի վերաբերյալ ևս մեկ գործ է քննվել: Մասնավոր al-Fajr թերթը հրապարակել է բացահայտող հոդված, որտեղ նշվում է, որ Եգիպտոսի նախագահը 2008 թ. գլխի ուռուցքի հեռացման վիրահատություն է տարել, որից հետո նրան պարբերաբար էպիլեպսիայի նոպաներ են հետապնդում: Դատարան դիմած հայցվորը կասկած է հայտնում, որ Մուհամմեդ Մուրսին ի վիճակի է ղեկավարել երկիրը:
