Այսօր, անդրադառնալով ԶՈւ սպա Արտակ Նազարյանի գործով դատավարական խախտումներին, տուժողի իրավահաջորդ Ծովինար Նազարյանը՝ Արտակ Նազարյանի քույրը, և նրա ներկայացուցիչները՝ փաստաբան Մուշեղ Շուշանյանը, իրավապաշտպան Ռուբեն Մարտիրոսյանը, նշել են, որ Արտակ Նազարյանի ինքնասպանության վարկածը «փլվել» է, իսկ հոգեբան Էլդա Գրինին քրեական պատասխանատվության կենթարկեն:
Էլդա Գրինն «Առաջին լրատվական»-ի հետ զրույցում, տեղեկանալով, որ իր դեմ հնարավոր է քրեական գործ հարուցվի, քանի որ, ըստ իրավապաշտպանի և փաստաբանի, բանակում տեղի ունեցող սպանությունները «ինքնասպանություն որակելու մեծ փորձ ունի ինքը», նշեց, որ եթե սպանություն է որակվել, գրում են սպանություն, եթե ինքնասպանություն է որակվել, գրում են ինքնասպանություն, սպանության և ինքնասպանության որակումը չի մտնում հոգեբան-փորձագետի իրավասության մեջ: Քննիչները քննում են գործը և որակում, օրենքը ընդհանրապես իրավաբանական ոլորտում է, և նրանք են հոդվածն ընտրում:
«Հոգեբանն իրավունք չունի վերաորակել, հոգեբան-փորձագետի կամ ցանկացած փորձագետի եզրակացությունը ապացույցների շարքում ևս մեկ ապացույց է, դատարանը կարող է դա ընդունել կամ կարող է չընդունել, որովհետև դատարանն է տալիս վերջնական եզրակացությունը: Դրա համար ես 02-ին դեմ եմ»,-հավելեց Էլդա Գրինը՝ նշելով, որ ամբողջ աշխարհում է այդպես, փորձագետը մանրամասն ուսումնասիրում է քրեական գործը, պատասխանում է այն հարցերին, որոնք իրեն ուղղված են, մինչդեռ ինքնասպանության ժամանակ այդ իրավունքն էլ չի տրվում, ուղղակի հարցեր են տալիս, և հարցերին պատասխանում ես:
Նա նշեց, որ հարցերը լինում են երկու տեսակի՝ անհատական-հոգեբանական առանձնահատկությունների վերաբերյալ, որոնք կարող են նպաստել այդ քայլը կատարելուն, և երկրորդը՝ պատճառահետևանքային կապ կա՞, թե՞ չկա՝ հասցրե՞լ են ինքնասպանության, թե՝ ոչ: Ըստ հոգեբանի՝ չի եղել և չի կարող լինել հարց՝ դա սպանությո՞ւն էր, թե՞ ինքնասպանություն, որովհետև ցանկացած իրավաբանի պարզ է, որ սա հոգեբանի իրավասության մեջ չի մտնում:
Նա նաև նշեց, թե որքան լավ է ինքը նկարագրել Արտակի փորձագիտական եզրակցության մեջ, իսկ երկտողն էլ ուղարկել են ձեռագրաբանական փորձաքննության, որտեղից պատասխանել են, որ Արտակ Նազարյանն է գրել այն։ «Սա հոգեբան-փորաձագետի իրավասության մեջ չի մտնում: Աղմուկ բարձրացրին, ես ոչ մի բան ո՛չ ասել եմ, ո՛չ էլ ուզում էի ասել, ընդհակառակը՝ ես ինձ նույնիսկ զսպում էի, քանի որ պետք է լինել չեզոք դիրքում: Ես տվել եմ իմ օբյեկտիվ եզրակցությունը, որտեղ ոչ մի բան չկա, որը կարող է ըմբոստություն առաջացնել, բայց քանի որ ուզում են թատրոն սարքել, իմ ասած ուղղակի բառը շուռ են տվել օգտագործում են՝ ինչպես ուզում են, և աղմկում: Ես մեծագույն համակրանք և հարգանք ունեմ նրա նկատմամբ»,- ասաց Էլդա Գրինը՝ ավելացնելով, որ փորձագետը չի կարող իմանալ, թե որքանով է անաչառ կազմվում գործը մինչև իրեն ուղարկելը:
Նա նաև մի դեպք հիշեց, երբ գրեթե համոզված է եղել, որ ոչ թե ինքնասպանություն, այլ սպանություն է կատարվել, բայց որևէ բան չի կարողացել անել, քանի որ ի սկզբանե իրեն ուղարկվել էր գործը որպես ինքնասպանություն:
Իսկ հարցին՝ հնարավո՞ր է ինքը սխալված լինի, Է. Գրինը պատասխանեց, որ կարող է մեկ այլ փորձագետ էլ, եթե ուզում են, եզրակցություն անի։ «Մեկ տարի է՝ նրանք ասում են, որ ձեռագիրը կուղարկեն արտասահման, դե թող ուղարկեն»,-հավելեց նա:
