ԱՄՆ ափերին մոտեցող «Սենդի» փոթորկի պատճառով ավիաընկերությունները չեղալ են հայտարարել հոկտեմբերի 28-ին և 29-ին նախատեսված ավելի քան 7100 չվերթ: Այս մասին հաղորդում է Reuters-ը: The Wall Street Journal-ի տվյալներով՝ հետաձգված չվերթների թիվը հասնում է 8000-ի:
Մասնավորապես, Delta Airlines ավիաընկերությունը կիրակի չեղյալ է հայտարարել 180 չվերթ, իսկ երկուշաբթի այդ թիվը կարող է հասնել մի քանի հարյուրի: American Airlines-ը նախատեսում է հոկտեմբերի 28-31-ն ընկած ժամանակահատվածում չեղյալ հայտարարել մոտ 1500 չվերթ: U.S. Airways-ը՝ մոտ 2000: U.S. Airways-ը պատրաստվում է վերականգնել չվերթները հոկտեմբերի 30-ին, սակայն ընկերությունում նշել են, որ ջրհեղեղի կամ փոթորկի տևականությունը, ինչպես նաև ինքնաթիռների տեղափոխումը անվտանգ կայաններ, կարող է հանգեցնել լրացուցիչ հետաձգումների:
Ավիաընկերությունները, սակայն, հրաժարվել են փոխհատուցում վճարել ուղևորներին: Գործակալության տվյալներով՝ տեղի հյուրանոցները գերհագեցած են:
Նմանատիպ իրավիճակ առաջացել էր 2011 թ. օգոստոսին, երբ «Իրեն» փոթորկի հետևանքով հետաձգվեց շուրջ 10 հազար չվերթ:
Ակնկալվում է, որ «Սենդի»-ին ԱՄՆ-ի արևելյան ափին կհասնի հոկտեմբերի 29-ի երեկոյան, կանցնի Նյու Յորքով ու Նյու Ջերսիով և կշարժվի դեպի Փենսիլվանիա նահանգ:
Փոթորկի պատճառով Նյու Յորքում հայտարարվել է արտակարգ իրավիճակ: Քաղաքապետի կարգադրությամբ, հոկտեմբերի 28-ից սկսվել է քաղաքի առավել վտանգավոր հատվածներից բնակչության տարահանումը, դադարեցվել են քաղաքային տրանսպորտի աշխատանքները: Հոկտեմբերի 29-ից կփակվեն դպրոցները և պետական հաստատությունները (բացառությամբ արտակարգ գերատեսչությունների), ՄԱԿ-ի գրասենյակը, քաղաքային զբոսայգիները և գրադարանները, քաղաքի որոշ հատվածներում կանջատվեն վերելակները և ջրամատակարարումը, մասամբ աշխատանքները կդադարեցնեն Նյու Յորքի ֆոնդային և առևտրային բորսաները:
Տեղեկության արագ տարածման համար Նյու Յորքում բացվել է թեժ գիծ, մի շարք ԶԼՄ-ներ, այդ թվում Reuters-ը և Daily News-ը, ուղիղ հեռարձակում են միացրել, Twitter-ում ի հայտ է եկել #Sandy հեշթեգը:
Ավելի վաղ փոթորիկը, առաջանալով Կարիբյան ծովում, անցել է Կուբայով, Յամայկայով և Հաիթիով: Դրա հետևանքով զոհվել է ավելի քան 60 մարդ:
