Մի քանի քրեական գործերով հասարակությանը հայտնի հանգամանքներում որպես մեղադրյալ չներգրավված Սյունիքի մարզպետ Սուրեն Խաչատրյանը երեկ որոշել էր էթիկայի մասին հրապարակավ դասեր տալ: Լիսկա մականունով հայտնի մարզպետի զայրույթի առիթը «Ժողովուրդ»- ի երեկվա համարում հրապարակված լուրն էր, ըստ որի`մարզպետը բարկացել է, որ ԲՀԿ առաջնորդ Գագիկ Ծառուկյանը, մնացած պաշտոններից բացի, նաև Սյունիքի մարզպետի պորտֆելն է պահանջել:
«Նա այնքան զայրացած է եղել, որ անգամ հայհոյել է»,- գրել էր թերթը`չնշելով թե ում: «Թարսի պես» երեկ առավոտյան, Սերժ Սարգսյանը մեկնել էր Սյունիքի մարզ և ամենայն հավանականությամբ ոչ հաճելի բովանդակությամբ զրույց ունեցել մարզպետի հետ`«մեծ-մեծ խոսելու, լարված իրավիճակում մթնոլորտն առավել թեժացնելու համար»: Այնուհետև Խաչատրյանը շտապել է հեռախոսով հրահանգել անձնական օգտագործման լրագրողներին`մի կոպիտ հերքման տեքստ պատրաստել ու տարածել: Եվ ահա կեսօրին մարզպետի հերքման տեքստը տարածվեց: Բայց դա իրականության հետ կապ չունի:
«Ժողովուրդ»-ի աղբյուրները նոր մանրամասներ հաղորդեցին այդ «չարաբաստիկ» հանդիպման վերաբերյալ: Պարզվում է`օրերս մարզպետի մոտ ժողովի գնացած մարզպետարանի վարչության աշխատակիցները, փոխմարզպետերը և մարզպետի մտերմուհիները (մի քանի ուսհաստատությունների ղեկավարներ) (անուններ առայժմ չենք հրապարակում), երբ փորձել են տեղեկանալ Խաչատրյանի պաշտոնանկության և արտերկրում որոշ ժամանակով բուժման կուրսեր անցնելու լուրերի մասին, մարզպետն ակնարկել է, որ կարճատև արձակուրդ է մեկնելու` մինչև իրավիճակը հանդարտվի: Այդ հավաքի ժամանակ նա նաև հայտարարել է, թե ԲՀԿ առաջնորդ Գագիկ Ծառուկյանը Սյունիքի մարզպետի պաշտոնն է ուզում` միաժամանակ հիշեցնելով, որ «Սյունիքը հանրապետականներինն է»: Մնացածը, ինչպես կասեր Ծառուկյանը, հաջորդ դասին:
Հ. Գ. «Ժողովուրդ»-ի որոշ գործընկերներ երեկ զարմանայի փութաջանությամբ շտապեցին տարածել Լիսկայի չստացված հերքումը ավելորդ համարելով սպասել` տեղեկատվության սկզբնաղբյուրի արձագանքին: Հուսանք այս տեքստը ևս նույն ակտիվությամբ կտարածվի` որպես լկտի հերքման հերքում:
