Գիշերը Հալեպի հայաշատ Նոր Գյուղ թաղամասը կրակների մեջ է եղել: Հալեպի արվարձանային շրջաններում ծավալված բախումների արդյունքում ռումբեր են ընկել նաև հայաշատ Նոր Գյուղ թաղամաս՝ մի քանի ժամ տագնապի ու վախի մեջ պահելով թաղամասի բնակիչներին: Այսօր «Առաջին լրատվական»-ի հետ զրույցում այս մասին տեղեկացրեց Հալեպի Բերիո Հայոց թեմի առաջնորդարանի բանբեր Ժիրայր Ռայիսյանը:
Ըստ նրա՝ պայթյունների արդյունքում հրդեհ է բռնկվել, բավական մեծ վնասներ են պատճառվել թաղամասի շենքերին, ավտոմեքենաներին: Բայց Ժիրայր Ռայիսյանի խոսքերով՝ այս գիշեր ամենամեծ կորուստը եղել է Նոր Գյուղի բնակիչներ Հասմիկ Կիրակոսյանի և Բարսում Բարսումյանի մահը:
«Բացի զոհերից, յոթ-ութ վիրավոր ունեցանք։ Նրանցից ոմանք՝ ավելի լուրջ վնասվածքներով, տեղափոխվել են հիվանդանոց և վիրահատվելու կարիք ունեն: Կան մարդիկ, որոնց վնասվածքներն ավելի թեթև են, ուստի նրանք առաջին օգնությունը ստանալուց հետո իրենց տները վերադարձան:
«Շտապ օգնության» մեր երիտասարդները դեպքի վայրում օգնության աշխատանքներ ձեռնարկեցին, վիրավորներին և զոհերին դուրս բերեցին իրենց տներից։ Միաժամանակ, երիտասարդների մեկ այլ խումբ կրակը մարելու աշխատանքներին լծվեց»,- ասաց Ժիրայր Ռայիսյանը՝ շարունակելով, որ առավոտյան կրկին նույն շրջանում պայթյուն տեղի ունեցավ, սակայն այն այդքան լուրջ վնասներ չպատճառեց:
Նրա խոսքերով՝ մինչ այս գիշեր բավական կայուն օրեր էին եղել, մարդիկ փորձում էին իրենց տները վերադառնալ և վերսկսել կյանքը, սակայն երեկվա պայթյունները կրկին խուճապի մատնեցին ժողովրդին:
Ժիրայր Ռայիսյանն ասաց, որ այս օրերին երկրի իշխանական բանակի և ընդդիմադիրների բախումները ծավալվում են Բոստան Փաշայի շրջանում, ամբողջ օրվա ընթացքում ռմբակոծություններ են ու մարտեր։ Համաձայն որոշ տեղեկությունների՝ Սուլեյմանիե շրջանում ևս երեկ գիշեր ռումբ է ընկել շենքերից մեկի վրա:
