ԱՄՆ-ում բացահայտվել է երկրի պատմության մեջ ամենադաժան սերիական մարդասպաններից մեկը: 10 տարի առաջ մահապատժի դատապարտված Ուեսլի Շերմանտայնը խոստովանել է, որ իր մանկության ընկերոջ՝ Լորեն Հերցոգի հետ սպանել է 72 մարդու: Միայն վերջերս գումարի դիմաց նա խոստացել է հայտնել իր բոլոր չարագործությունների մասին: Այս մասին հաղորդում է ABC հեռուստաալիքը՝ վկայակոչելով ՀՖԲ-ին (FBI)։
Անցյալ տարի մասնավոր խուզարկու ընկերություններց մեկը մահապատժի դատապարտվածների խցում գտնվող Ուեսլի Շերմանտայնին առաջարկել էր գումարի դիմաց հայտնել, թե որտեղ է թաքցրել իր զոհերի մարմինները: Գործարքը կազմել է 33 հազար դոլար, որը հանցագործը կծախսի բանտում առավել հարմար պայմաններ ստեղծելու համար:
Դատարանը Շերմանտայնին մեղավոր էր ճանաչել Կալիֆոռնիայում 4 կանանց սպանության մեջ: Չի բացառվում, որ նրա զոհերի թիվը զգալիորեն կաճի: Հեռուստաալիքի տվյալներով՝ նա նշում է նոր անուններ, որոնք համարվում էին անհետ կորած, և բացահայտում նրանց մահվան հանգամանքների մասին նոր փաստեր:
Հանցագործ համախոհների զոհերի մեծ մասը եղել են կանայք և աղջիկներ: Նրանք հարձակումներ են գործել ամայի փողոցներում և խուլ վայրերում: Հանցագործություններն իրականացվել են 20-րդ դարի 80-90-ական թթ: Հանցագործների զոհերը հիմնականում եղել են թմրամոլներ ու մարմնավաճառներ: Ուստի նրանց անհետացումը չի արժանացել իշխանությունների ուշադրությանը:
Փորձագետները բացառում են Ուեսլի Շերմանտայնի գործում շրջադարձերը: Քննարկվում է միայն մահապատիժն ի կատար ածելու հնարավոր ժամկետի հարցը:
