Այսօր ադրբեջանցի մարդասպան Ռամիլ Սաֆարովի կողմից Հունգարիայի մայրաքաղաք Բուդապեշտում կացնի հարվածներով սպանված հայ սպա Գուրգեն Մարգարյանը կդառնար 34 տարեկան: Գուրգենի ընկերը` պաշտպանության նախարարին կից կոլեգիայի քարտուղար Հայկ Մակուչյանը, որը նրա հետ Հունգարիայում մասնակցել էր ՆԱՏՕ-ի դասընթացներին, այսօրվա ասուլիսում նրան «բարի հսկա» ներկայացրեց:
«Շատ բարի հսկայի տպավորություն էր թողնում, ֆիզիկապես ուժեղ և շատ բարի: Ընկերոջը հասնող էր, բոլորին ուզում էր օգնել: Եկավ ասաց` մի կին կա Հայաստանից, ուզում է՝ տուն զանգի, բայց փող չունի, արի քարտը տանք, թող զանգի: Այդ բարի հսկան իմ մեջ տպավորվել է»,- իր հիշողությունները կիսեց Հայկ Մակուչյանը:
Նա հունգարական դատարանի կողմից տուժող էր ճանաչվել, և այժմ խորհրդակցում է իրավաբանների հետ` միջազգային դատական ատյաններ դիմելու և արդարադատությունը վերականգնելու համար:
Մարդասպան Ռամիլ Սաֆարովը Գուրգեն Մարգարյանին սպանելուց հետո մտադիր էր սպանել նաև Հայկ Մակուչյանին, սակայն նրա սենյակի դուռը կողպված է եղել: Հունգարական դատարանի կողմից Հայկ Մակուչյանը տուժած է ճանաչվել, և այժմ, երբ Ադրբեջան արտահանձնված Սաֆարովին ներում է շնորհվել, նա մտադիր է մինչև վերջ գնալ` վերականգնելու արդարությունը:
Հայկ Մակուչյանը հերքեց ադրբեջանական կողմի տարածած այն խոսակցությունները, թե իբր հայերը Բուդապեշտում ծաղրել են ադրբեջանցիներին, անարգել նրանց դրոշը:
«Իրենք ակտիվորեն չէին մասնակցում դասընթացներին, եթե մեկ-մեկ չտեսնեինք, նրանց չէինք էլ հիշի: Առաջին օրը բարևել ենք, հարցրին` դուք Հայաստանի՞ց եք, հետո Սաֆարովը ռուսերն ասաց. «Мы братья»:
Բացարձակ սուտ է, թե նրանց ծաղրել ենք: Նախ այնտեղ ոչ մի դրոշ չի եղել: Տարբեր ազգերի ներկայացուցիչներ դատարանում ցուցմունք են տվել, որ նման բան չի եղել: Սաֆարովը սկզբում շատ ճիշտ ցուցմունքներ էր տվել, երբ հույս ուներ, թե իրեն տեղափոխելու են Ադրբեջան: Ասել էր` ինձ համար կարևոր չէ՝ ով կլինի, կարևորը՝ հայ լինի, ես ուզում եմ հայ սպանել»,- պատմեց Հայկ Մակուչյանը:
Նա Ռամիլ Սաֆարովին սպանության բութ գործիք անվանեց. «Նա ինձ համար մի իր է, որն իր գործն արեց: Ցավալին այն է, որ այդպիսի իրեր շատ կան, նրանց համակարգը ստեղծում է այդ իրերը»:
Լուսանկարը՝ PanARMENIAN Photo-ի
