Իսպանացի թոշակառու տատիկի պատմությունը, որն առանց իշխանությունների թույլտվության փորձել էր ռեստավրացնել XIX դարի որմնանկարը և արդյունքում աղավաղել էր այն, չի ավարտվել աշխարհին նրա հայտնի դառնալով: Նրա ստեղծագոծությունը իսկական զբոսաշրջային վայր է դարձրել Բորհա փոքր քաղաքը, որի եկեղեցում է Հիսուսի աղավաղված որմնանկարը: Եկեղեցին արդեն այցելուներից հազարավոր եվրոներ է աշխատել: 80-ամյա Սեսիլիա Խիմենեսը հարստության իր մասնաբաժինն է պահանջում: Այս մասին հայտնում է Newsru.com-ը:
Զբոսաշրջիկները եկեղեցի մտնելու համար պարտադիր 4 եվրո են վճարում, որոնք պետք է ուղղվեն որմնանկարի վերականգնմանը: Միայն առաջին 4 օրերի ընթացքում եկեղեցին կարողացել է 2000 եվրո հավաքել:
Գումարի ստացումը թոշակառուի համար սկզբունքային է, նա մտադիր է այդ միջոցներն ուղղել բարեգործությանը, մասնավորապես մկանային ատրոֆիայի դեմ պայքարին, ինչով էլ տառապում է իր որդին:
