ԱՄՆ պետքարտուղար Հիլարի Քլինթոնը խնդրել է մինչև 2013թ. մայիս երկարացնել USAID-ի (ԱՄՆ-ի միջազգային զարգացման գործակալություն) աշխատանքները Ռուսաստանում: Համապատասխան բովանդակությամբ նամակ ԱՄՆ պետքարտուղար Հիլարի Քլինթոնն ուղարկել է Ռուսաստանի իր գործընկեր Սերգեյ Լավրովին: Ինչպես հաղորդում է «Կոմերսանտ» թերթը, Ռուսաստանի կառավարությունում հաստատել են Քլինթոնից նման նամակ ստանալու փաստը, սակայն չեն բացահայտել բովանդակությունը:
ԱՄՆ պետդեպի պաշտոնական ներկայացուցիչ Վիկտորյա Նուլանդը հայտարարել է, որ USAID-ը «հաջորդ ֆինանսական տարում նոր պայմանագրեր չի կնքի»:
Ռուսաստանի ԱԳՆ-ն, սեպտեմբերի 19-ին մեկնաբանելով USAID-ի աշխատանքների դադարեցման որոշումը, հայտարարել է, որ կազմակերպության աշխատանքների բնույթը միշտ չէ, որ համապատասխանել է հայտարարված նպատակներին: Դրանում ասվում է, որ դրամաշնորհների միջոցով USAID-ն փորձում է ազդել քաղաքական գործընթացների և հասարակության քաղաքացիական ինստիտուտների վրա:
Ռուսաստանի նախագահ Վլադիմիր Պուտինն իր համաձայնությունն է տվել ԱԳՆ գնահատականին: Մասնավորապես, նրա մամուլի քարտուղարն ասել է, որ «նախագահը նույնպիսի դիրքորոշում ունի»:
USAID-ի աշխատանքների դադարեցման մասին հայտնի է դարձել սեպտեմբերի 18-ին: Հաղորդվում էր, որ գործակալությունը պետք է փակվի 2012 թ. հոկտեմբերի 1-ից: Կազմակերպությունը Ռուսաստանում աշխատում է 1992 թվից: Այդ ընթացքում այն ավելի քան 2.6 մլրդ դոլարի ներդրումներ է կատարել Ռուսաստանի առողջապահության, արդարադատության և տեղական ինքնակառավարման ոլորտներում:
