Արտասահմանյան ԶԼՄ-ները վերլուծության են ենթարկել Իրանի միջուկային ծրագրի վերաբերյալ Իսրայելի հայտարարություններն ու վերջին զարգացումները և մասնավորապես ԱՄՆ նախագահ Բարաք Օբամայի ու Իսրայելի վարչապետ Բենիամին Նեթանյահուի միջև լարվածության աճումը:
Ամերիկյան The Washington Post թերթը գրել է, որ գոյություն ունեն ակնհայտ ցուցիչներ, որ մենք շարժվում ենք Մերձավոր Արևելքում նոր պատերազմին ընդառաջ. «Այս շաբաթ Բենիամին Նեթանյահուն հրապարակավ ԱՄՆ-ին մեղադրեց Իրանի միջուկային ծրագրի վերաբերյալ «կարմիր գիծ» չսահմանելու մեջ, որն Իրանի կողմից հատելու դեպքում ԱՄՆ-ը պետք է հարված հասցնի նրան:
Իսրայելում շարունակում են լրջորեն վիճել Իրանի վրա հարձակվելու կապակցությամբ, և մեծ մասը հանդես է գալիս միակողմանի գործողությունների դեմ: Շատ իսրայելցիներ հասկանում են, որ այդ հարվածը կհետաձգի, բայց չի վերացնի Իրանի միջուկային ծրագիրը: Իսրայելական հարձակումը իրանցիների շրջանում կբարձրացնի միջուկային ծրագրի հանրաճանաչությունը և անգամ կամրապնդի իշխող ռեժիմը»:
Բրիտանական The Financial Times թերթը գրում է, թե Նեթանյահուն հայտարարել է, որ նրանք, ովքեր հրաժարվում են «կարմիր գիծ» սահմանել Իրանի համար, իրավունք չունեն կարմիր լույս վառել Իսրայելի առջև. «Իսրայելում ավելացել են անհանգստությունները՝ Նեթանյահուի կառավարության ու ԱՄՆ-ի միջև տարաձայնությունների մեծացման կապակցությամբ:
ԱՄՆ-ում Իսրայելի նախկին դեսպան Իտամար Ռաբինովիչը հայտարարել է, որ եթե Իսրայելի վարչապետն ընտրություններից առաջ քննադատում է ԱՄՆ նախագահին, որոնցում կարևոր տեղ է զբաղեցնում Իրանի թեման, ապա դա անհարմար պահ է: Չնայած դրան՝ ԱՄՆ-ի ու Իսրայելի միջև հարաբերությունները մնում են ամուր»:
Ֆրանսիական Le Monde թերթն իր հերթին գրում է, որ վերջին օրերին Օբամայի ու Նեթանյահուի միջև հակասությունների մեծացումը ստիպում է մտածել, թե ինչպիսի հետևանքներ կարող է ունենալ այն. «Կարո՞ղ է Իսրայելը գործել՝ շրջանցելով ԱՄՆ առարկությունները: Տեղի ունեցած երկու նախադեպերը դրական պատասխան են տալիս դրան:
Երբ 1981թ. հունիսի 7-ին իսրայելական ավիացիան ոչնչացրեց «Օսիրաքի» իրաքյան միջուկային ռեակտորը, երկրի ղեկավարությունն այդ քայլին գնացել էր առանց ԱՄՆ համաձայնության: Նույն բանը տեղի ունեցավ 2007թ. սեպտեմբերի 5-ին սիրիական «Ալ-Քիբար» ռեակտորի ոչնչացման պարագայում: Իհարկե, Իրանը Սիրիա չէ, սակայն այս օրինակները, ինչպես նաև Նեթանյահուի ռազմաշունչ հայտարարությունները լուրջ մտահոգություն են առաջացնում Վաշինգտոնում և այլ երկրներում»:
