ՄԱԿ-ի գլխավոր քարտուղար Պան Գի Մունը կոչ է անում պատժել Սիրիայում իրականացված հանցագործությունների մեղավորներին՝ լինեն դրանք վարչակարգի անդամներ, թե ընդդիմության:
«Մենք պետք է ապահովենք, որպեսզի ռազմական հանցագործություն, մարդկության դեմ հանցագործություն կամ մարդու իրավունքների այլ խախտումներ իրականացրած յուրաքանչյուր ոք՝ երկու կողմերից էլ, հանձնվեն արդարադատությանը»,- ասել է ՄԱԿ-ի գլխավոր քարտուղարը այսօր Ժնևում տեղի ունեցած ՄԱԿ-ի մարդու իրավունքների խորհրդի նիստում:
Ինչպես հաղորդում է France-Presse գործակալությունը, Պան Գի Մունը հայտնել է, որ խորապես անհանգստացած է կառավարական զորքերի ռմբակոծություններով, ինչպես նաև ազգամիջյան լարվածությամբ և հումանիտար իրավիճակի վատթարացմամբ: Նա նաև դատապարտել է այն փաստը, որ երկու կողմերն էլ ընտրել են բռնության, ոչ թե երկխոսության ճանապարհը, և կոչ է արել շահագրգիռ կողմերին պաշտպանել Սիրիայի նոր հատուկ բանագնացի ջանքերը:
