Օրեր առաջ մամուլում տարածված հայտարարությունը, որն, իբր, տարածել էր ԲՀԿ առաջնորդ Գագիկ Ծառուկյանի սանիկ, «Քինգ դե լյուքս» ընկերության սեփականատեր Արթուր Հարությունյանը (Պալաչ), «Առաջին լրատվական»-ի հավաստի տեղեկություններով, ամենևին էլ վերջինս չի տարածել, այլ Գագիկ Ծառուկյանին պատկանող լրատվամիջոցներից մեկը:
Մեր աղբյուրների տեղեկացմամբ, հայտարարությունը տարածվել է ի պատասխան անցյալ շաբաթ Կապի և տրանսպորտի նախարարության միջոցով` վեճի սուբյեկտների` Գագիկ Ծառուկյանի և Արթուր Հարությունյանի (Պալաչ) «հաշտության» մասին տարածած լուրերի:
Հիշեցնենք, որ օրերս համացանցում հայտարարություն էր տարածվել Արմեն Հարությունյանի՝ Պալաչի անունից, ով հայտնի դարձավ խորհրդարանի ընտրությանը ԲՀԿ-ից ՀՀԿ անցումով և Գագիկ Ծառուկյանի դեմ սկսված գրոհներով:
Արթուր Հարությունյանը Ծառուկյանի սանիկն է, նախկին զինակիցը, որի օգնությամբ նաև շատ բիզնեսների տեր է դարձել, մասնավորապես` տրանսպորտային գծերի: Սակայն Ծառուկյանի հետ գժտվելուց հետո Պալաչը բախվեց ԲՀԿ առաջնորդի դիմադրությանը: Նա բարեգործական երթուղիներ բացեց այն ուղղություններով, որով Պալաչի գծերն էին անցնում: Այդ գծերի վարորդները սկսեցին գործադուլ անել, իսկ օրերս էլ կապի ու տրանսպորտի նախարարությունը հայտարարեց, թե խնդրի կապակցությամբ պայմանավորվել են «Գագիկ Ծառուկյան» բարեգործական հիմնադրամի հետ, որպեսզի լինի այնպես, որ թե՛ բարեգործությունը շարունակվի, թե՛ տնտեսվարողը չտուժի:
Եվ ահա հուլիսի 26-ին մի հայտարարություն էր տարածվել Արթուր Հարությունյանի անունից, թեև որևէ տեղ չի նշվում, թե որտեղ, ինչ խողովակով է այդ հայտարարությունը հայտնվել: Դրանում, մասնավորապես, նշվում է. «Ես ցավում և ափսոսում եմ, որ Գ. Ծառուկյանի հանդեպ թույլ եմ տվել որոշ ձևակերպումներ և արտահայտություններ: Գուցե դա իմ անփորձության կամ հուզմունքի արդյունքն էր, բայց ոչ երբեք`միտումնավորության: Ես միշտ բարձր եմ գնահատել Ծառուկյանի կատարած աշխատանքը մեր պետության և մեր ժողովրդի համար ու նաև` նրա բարեգործական գործունեությունը: Ես մարդկայնորեն խնդրում եմ բոլոր լրատվամիջոցներին` մի՛ շահարկեք այդ թեման: Հարցը, խնդրում եմ, համարել փակված: Իմ բոլոր խնդիրները ես կներկայացնեմ անձամբ Գ. Ծառուկյանին և կխնդրեմ նրան արժանապատիվ լուծումներ գտնել: Մի բան կարող եմ հստակ ասել. ես թույլ չեմ տա երրորդ կողմին օգուտներ քաղել ծագած խնդիրներից»:
