Էլվիս Մադաթյանի հովանավորությամբ տեղի ունեցող բարեգործական ակցիայի շրջանակում Շիրակի մարզի անօթևան և սոցիալապես ծանր պայմաններում ապրող ընտանիքների երեխաներին տրամադրվում են հագուստ, կոշիկ, նաև գրենական պիտույքներ:
Shirakcentre.org-ի փոխանցմամբ` ամերիկահայ բարերար Էլվիս Մադաթյանի հովանավորությամբ «Ոչ մի երեխա դպրոցից չպետք է դուրս մնա հագուստ և գրենական պիտույքներ չունենալու պատճառով» խորագիրը կրող բարեգործական ծրագրի շրջանակում «Շիրակ կենտրոնի» աշխատակիցները այսօր այցելեցին և օգնություն տրամադրեցին Գյումրու «Ձորի թաղամասի» կիսաքանդ տանը Թագուհի տատիկի հետ բնակվող 4 դպրոցահասակ երեխաների, «Արցախ թաղամասի» փոքրիկ տանը երկու մանկահասակ երեխաների հետ բնակվող Լիանա և հաշմանդամ, բազմազավակ մայր Սոնիկ Ջեյրանյանների ընտանիքներին:
Այս բարեգործական ակցիայի շրջանակում Շիրակի մարզի անօթևան և սոցիալապես ծանր պայմաններում ապրող ընտանիքների երեխաներին տրամադրվում են անհրաժեշտ հագուստ, կոշիկ, հետագայում նաև` գրենական պիտույքներ, որպեսզի վերջիններս դրանց բացակայության պատճառով չզրկվեն դպրոց հաճախելու և կրթություն ստանալու հնարավորությունից: Անցած երկու ամիսներին օգնություն են ստացել մոտ 80 ընտանիքի ավելի քան 200 երեխաներ:
Թեև կազմակերպությունն արդեն իսկ ունի Շիրակի մարզի սոցիալապես ծանր պայմաններում ապրող հարյուրավոր ընտանիքների և ծնողազուրկ երեխաների վերաբերյալ մանրամասն տեղեկություններ, նաև մոտ 300 ընտանիքների մասին տվյալներ տրամադրել է Շիրակի մարզպետարանը, այնուամենայնիվ` եթե որևէ մեկը տեղյակ է Շիրակի մարզում ապրող նման երեխաների մասին, անհրաժեշտ տեղեկատվությունը կարող է ուղարկել [email protected], [email protected] էլեկտրոնային հասցեներով:ok
