Մամուլում շրջանառվող տեղեկությունները, թե իբր ոստիկանությունն ու Ազգային անվտանգության ծառայությունն արգելել են Ղուկասյանի որդուն` Սպարտակին, մեկնել Մոսկվա (ուր նա գնում էր «օրենքով գող» «կարգվելու» համար), անհեթեթություն են: «Առաջին լրատվական»-ի հետ զրույցում այս մասին ասաց Գյումրու քաղաքապետ Վարդան Ղուկասյանի մամուլի քարտուղար Լիլիթ Աղեկյանը:
«Ես չեմ հասկանում, մարդիկ պարա՞պ են, նստում են իրենց խոհանոցներում, լուրեր են հորինում ու տարածում: Ի՞նչ նպատակ ունի նման կարգի տեղեկատվություն շրջանառելը: Կոնկրետ ես, քաղաքապետի որդուն Հայաստանի սահմաններից դուրս չթողնելու մասին տեղեկություն չունեմ: Մամուլի «հավաստի» տեղեկություններն ուղղակի ծիծաղելի են: Ոմանք իրենց մտքի փշրանքները բազմացնում են՝ աշխատավարձ ստանալու համար լուր հորինելով»,- ասաց Լիլիթ Աղեկյանը:
Հիշեցնենք՝ մամուլում լուրեր են տարածվել, որ ոստիկանությունն ու Ազգային անվտանգության ծառայությունն արգելել են Գյումրու քաղաքապետի որդուն` Սպարտակին, մեկնել Մոսկվա:
«Այսօր արդեն Գյումրիում խոսակցություններ են շրջանառվում, որ ինչ-ինչ համաձայնությունների արդյունքում Սպարտակին թույլատրվել է լքել երկիրը: Ասում են, որ վերջինս մեկնելու է Ռուսաստանի Դաշնություն՝ «օրենքով գող» «կարգվի» և վերադառնա: Գյումրեցիները այդ քայլը բացատրում են հետագայում, գաղութում հայտնվելու պարագայում (ինչը, նրա բնույթից ելնելով, չի բացառվում) իրեն ապահովագրելու միտումով, քանի որ, ինչպես հայտնի է, «օրենքով գողերը» «հատուկ պայմաններում» են կրում պատիժը»,- գրում է «Առավոտ»-ը: