Իրանական IRNA լրատվական գործակալության փոխանցմամբ՝ Իրանի միջուկային ծրագրի վերաբերյալ Իրանի ու «Վեցյակի» միջև բանակցությունների հերթական փուլը տեղի կունենա Ստամբուլում: Այս մասին հայտնել է Ստամբուլում եղած դիվանագիտական աղբյուրը:
Վերջինիս խոսքերով՝ այդպիսի պայմանավորվածություն է ձեռք բերվել Անկարայում Թուրքիայի արտգործնախարար Ահմեդ Դավութօղլուի ու Իրանի Ազգային անվտանգության բարձրագույն խորհրդի գլխավոր քարտուղարի տեղակալ Ալի Բաղերինի կողմից, ով պաշտոնական այցով ժամանել է Թուրքիա՝ մասնակցելու համար ԵՄ-ի՝ արտաքին քաղաքականության ու անվտանգության գծով գերագույն հանձնակատար Քեթրին Էշթոնի տեղակալ Հելգա Շմիդտի հետ խոսակցություններին:
Դիվանագիտական աղբյուրը հավելել է, որ Դավութօղլուն հայտարարել է, որ բանակցային հաջորդ փուլը Ստամբուլում անցկացնելու առաջարկը հավանության է արժանացել երկու կողմերից էլ՝ ընդգծելով, որ դեռ հայտնի չէ, թե կոնկրետ երբ տեղի կունենա Քեթրին Էշթոնի ու Իրանի Ազգային անվտանգության բարձրագույն խորհրդի գլխավոր քարտուղար Սայիդ Ջալիլիի հանդիպումը:
