1980թ. այս օրը մահացավ ռուս նշանավոր պոետ, երգիչ-երգահան, դերասան Վլադիմիր Վիսոցկին:
Խորհրդային իշխանությունների կողմից անտեսված լինելու փաստը Վիսոցկուն չխանգարեց կենդանության օրոք ձեռք բերել հիրավի համախորհրդային ճանաչում:
Վիսոցկին ծնվել է 1938թ. հունվարի 25-ին Մոսկվայում: Մանկությունը մոր հետ անցկացրել է Ուրալում աքսորում: Պատերազմից հետո հոր և հայուհի խորթ մոր հետ ապրել է Գերմանիայում, ապա` Մոսկվայում: Դեռ դպրոցում խաղացել է թատերական խմբակում, ընդունվել է Մոսկվայի Կույբիշևի անվան ճարտարագիտա-շինարարական ինստիտուտ, ապա` փոխադրվել ՄԳԱԹ-ի ստուդիա-դպրոցի դերասանական բաժանմունք:
Խաղացել է տասնյակ դերեր կինոյում և թատրոնում, 1964-ից խաղացել է Մոսկվայի Տագանկայի թատրոնում: Հեղինակել է շուրջ 600 երգ և 100 բանաստեղծություն, ունի նաև արձակ ստեղծագործություններ:
1970թ. համերգներ է տվել Հայաստանում:
