Գերմանիայի դատարանը կվերանայի Դյուսելդորֆի իշխանությունների դեմ հայցը, որոնք հրաժարվել են կենսաթոշակ վճարել նացիստական համակենտրոնացման ճամբարում ապրած գնչուի այրուն,- գրում է Tageszeitung-ը: Գործի քննությունը սկսվում է օգոստոսի 7-ին: Թե կոնկրետ երբ է հայց ներկայացվել՝ չի հաղորդվում: Տեղեկությունը ԶԼՄ-ներում հայտնվել է միայն այժմ, քանի որ գործում ընդգրկվել է Գերմանիայի գնչուների կենտրոնական խորհուրդը և այլ իրավապաշտպանական կազմակերպություններ:
Անտոն Բ.-ն մահացել է 2009 թ., որից հետո նրա կինը՝ Եվան, հայց է ներկայացրել կենսաթոշակ ստանալու համար, որը վճարվում է նացիստական բռնատիրության զոհերի ընտանիքին: Սակայն իշխանությունները նրան մերժել են, որից հետո նա դատարան է դիմել: Նրա ամուսինը ծնվել է 1924 թ. Բեթղեհեմում: 1943 թ. նա ձերբակալվել է և իր ընտանիքի հետ ուղարկվել է Օսվենցիմ: Անտոնը եղել է իր ընտանիքի՝ համակենտրոնացման ճամբարում ողջ մնացած միակ անդամը: Օսվենցիմում մահացել են նրա 10 եղբայրները, քույրը և հայրը:
Պատերազմի ավարտից 12 տարի անց Գերմանիայի իշխանությունները խոստովանել են, որ համակենտրոնացման ճամբարում աշխատանքը փչացրել է նրա առողջությունը: Այդ ժամանակ Անտոնին ցմահ կենսաթոշակ է նշանակվել 600 ե’եվրոյի չափով: Այդ գումարը նրա մահից հետո պետք է ստանար կինը:
Կնոջ պաշտպանությամբ հանդես է եկել Բավարիայում Գերմանիայի գնչուների միությունը:
Գերմանիայի գնչուների կենտրոնական խորհրդի ներկայացուցիչները փորձել են խնդրը լուծել ուղղակիորեն Դյուսելդորֆի իշխանությունների հետ, սակայն արդյունքի չեն հասել: Այժմ նրանք պատրաստվում են բաց նամակ գրել Հյուսիսային Հռենոս-Վեստֆալիայի վարչապետին: Խորհրդին վրդովեցնում է այն հանգամանքը, որ գերմանական դատարանները նախկինում չէին մերժում կենսաթոշակ վճարել անգամ նացիստ հանցագործների այրիներին:
