Ռոբերտ Քոչարյանի գրասենյակը որոշել է գաղտնի պահել այն տեղեկատվությունը, թե որ մանկատանն է փոխանցվել հօգուտ Քոչարյանի ընտանիքի «Ժամանակ» օրաթերթից դատական կարգով «վիրավորանքի» և «զրպարտության» համար գանձված 3 միլիոն դրամը: Հիշեցնենք, որ ավելի վաղ Քոչարյանի ընտանիքը հայտարարել է, թե «Ժամանակ»-ից դատական կարգով բռնագանձված գումարն իրենց պետք չէ, և այն փոխանցելու են մանկատներին:
Քոչարյանի գրասենյակի ղեկավար Վիկտոր Սողոմոնյանը «Առաջին լրատվական»-ի այն հարցին, թե Ռեբորտ Քոչարյանը կատարե՞լ է իր խոստումը և արդյոք փոխանցել է այդ գումարը մանկատներին, պատասխանեց. «Գիտե՞ք, եթե ես չեմ սխալվում, այո՛, փոխանցվել է և վաղուց: Թե որ մանկատանը, ես չէի ուզի հրապարակել»:
Փորձեցինք ճշտել՝ կարո՞ղ ենք տեսնել այն անդորրագիրը, որը կփաստի, որ փոխանցումն իրոք կատարվել է: «Վստահ եմ, որ փոխանցվել է: Դե, գիտե՞ք, ցանկության դեպքում ամեն ինչ էլ հնարավոր է, բայց ես չեմ կարծում, որ հիմա դա այդպես հրատապ խնդիր է»,- հարցը ցրեց Սողոմոնյանը:
Քանի որ Քոչարյանի գրասենյակը չի ցանկանում հրապարակել այն մանակատան անունը, որին իբր փոխանցվել է գումարը և ցրում է անդորրագրի տրամադրման հարցը, մենք հիմք ունենք կասկածելու, որ Ռոբերտ Քոչարյանի ընտանիքը վերոնշյալ փոխանցումն ամենևին էլ չի իրականացրել:
