Այսօր Մատենադարանի տարածքում հանրահավաք էր հրավիրել Տիգրան Կարապետյանը, որը ոչ մի կերպ չի հասկանում, թե ինչո՞ւ են ընդդիմադիր քաղաքական ուժերը իրեն կանչում միանալու, եթե կարծում են, որ ինքը իշխանությունների հետ է։ Մեկնաբանություններ ստանալու ակնկալիքով դիմեցինք «Ժառանգություն» խմբակցության պատգամավոր Ստեփան Սաֆարյանին։
«Տիգրան Կարապետյանը շատ հակասական կերպար է։ Նա իր հայտարարություններով իրեն հակասում է։ Նախկինում հայտարարում էր, որ կենտրոնամետ է, հիմա իրեն ընդդիմադիր է համարում»,-ասաց պատգամավորը։
Հարցին, թե հասարակության ո՞ր շերտն է մասնակցում Կարապետյանի հանրահավաքներին, պարոն Սաֆարյանն ասաց.
«Հիմնականում այն հատվածը, որը դիտում էր իր հեռուստաալիքը։ Կարծում եմ` այդ հատվածը կդադարի մասնակցել հանրահավաքներին, եթե ԱԼՄ-ն վերաբացվի։ Կա նաև մեկ այ հատված` երկրի սոցիալ-տնտեսական վիճակից դժգոհ մասսան, որը մասնակցում է ցանկացած հանրահավաքի` սկսած 1998թ-ից։
Նույն այդ մարդիկ մասնակցել են և՛ «Արդարություն» դաշինքի հանրահավաքներին, և՛ 2005թ սահմանադրական հանրաքվեի հետ կապված միջոցառումներին, և՛ ՀԱԿ-ի միտինգներին»։
Իսկ Կարապետիչի հայտնի` «Ես ինչո՞ւ պիտի միանամ ընդդիմությանը, թող ընդդիմությունը միանա ինձ» թեզիսին պատգամավորը հակադարձեց հետևյալ կերպ. «Ես մերժում եմ այդ գործելաոճը։ «Ժառանգություն» կուսակցությունը, ինչպես մի քանի օր առաջ հայտարարվեց, երբեք չի ասում` եկե՛ք, միացե՛ք մեզ։ Մենք ասում ենք` եկե՛ք միավորվենք»։
ՍԴՀԿ ատենապետ Լյուդմիլա Սարգսյանը մեր հարցին ի պատասխան ասաց.
«Առնվազն ծիծաղելի է, որ Տիգրան Կարապետիչը կարող է երևակայել, թե ՀԱԿ-ը` իր 17 կուսակցություններով, որ երեք տարի շարունակ ակտիվ պայքար է մղում, կարող է միանալ իրեն։
Ես կարծում եմ, որ նրա հետևում կանգնած են այլ` իշխանական քաղաքական ուժեր, կամ նա առնվազն փորձում է գտնել դրանց աջակցույթունը։
Շատ ուրախ կլինեի, եթե դա այդպես չլիներ, եթե Կարապետիչի հանրահավաքներն իր կամարտահայտությունը լիներ։
Եվ ընդհանրապես, Կարապետիչի թեման պիտի որ արդեն անհետաքրքիր լինի, քանի որ այսօրվա հանրահավաքը ցույց տվեց, որ նրա հետևում իրականում հոծ զանգված կանգնած չէ։
Առաջին երկու հանրահավաքների մասնակիցները, հետևաբար, ԱԼՄ-ի հեռուստադիտողներն էին։ Այս թեման այսքանով կարելի է փակված համարել»։
Հարցին, թե ինչպե՞ս կարելի է մեկնաբանել այն, որ Կարապետյանը պահանջել է «քաղաքական այլախոհներին» ազատ արձակել, սակայն խուսափել է «քաղբանտարկյալ» տերմինն օգտագործելուց, տիկին Սարգսյանն ասաց, որ դա ևս մեկ ապացույց է այն բանի, որ Տիգրան Կարապետյանի հայացքները չեն տարբերվում իշխանությունների տեսակետներից։
