Արձակուրդից հետո կերևա ՀԱԿ-ը բարձրացնում է Մարտի 1-ի հարցը, թե ոչ: «Առաջին լրատվական»-ի հետ զրույցում այս մասին ասաց 2008 թվականի մարտի 1-ին մահացած Հովհաննես Հովհաննիսյանի կինը՝ Լիլյա Մինասյանը: Նա նշեց, որ ՀԱԿ-ն ինչ-որ տեղ զբաղվել է այս հարցով, բայց մնացած ոչ մի կուսակցություն ոչնչով չի զբաղվել: «Գոնե մենք իրենցից ենք գործից մանրամասներ իմանում: Ես հավատում եմ, որ ՀԱԿ-ը կբարձրացնի Մարտի 1-ի հարցը խորհրդարանում: Ես շատ ուրախացա, որ ՀԱԿ-ը ԱԺ մտավ, հույս ունենք, որ գոնե ինչ-որ կերպ կբարձրացնեն այդ հարցը, երևի արձակուրդից հետո կերևա»,- կարծիք հայտնեց Լիլյա Մինասյանը:
Անդրադառնալով ԱԺ-ում «Հարսնաքարի» հարցը բարձրացնելու նախաձեռնությանը`նա ասաց, որ եթե Մարտի 1-ը չբացահայտեն, ուրեմն Վահե Ավետյանի գործի բացահայտումը նույնպես չի լինելու: «Եթե իրենք են մեղավորները, ո՞ւմ են ցանկանում գտնել: Եթե Մարտի 1-ը բացահայտվեր, հիմա նման դեպքեր էլ չէին լինի»,- հստակեցրեց իր միտքը Հովհաննես Հովհաննիսյանի կինը:
Նրա կարծիքով՝ Մարտի 1-ի դեպքում էլ նույն համախմբումը պետք է լիներ, ինչ Վահե Ավետյանի: «Ոչ մեկը չէր մտածում, թե մեր կորուստն ինչ կորուստ է: Ես այնքան ուրախ կլինեմ, որ այս երկիրը թողնեմ և գնամ: Հաշվի առնելով իմ ամուսնու հայրենասիրությունը՝ դա չեմ անում, նա այնքան հայրենասեր է եղել, որ պայքարել է հայ ազգի համար, հիմա ես լքեմ գնա՞մ, գեղեցիկ չի լինի: Ես չեմ լքում, բայց մեծ հաճույքով կլքեի կգնայի: Ո՛չ աշխատանք ունենք, ո՛չ իմ ընտանիքում տղամարդ կա, իմ երեխան գնում է աշխատանք փնտրելու, չեն ընդունում, որպես զոհի աղջիկ, ուրեմն թող վտարեն մեզ Թուրքիա»,- ցավով նշեց Լիլյա Մինասյանը:
