Այսօր առավոտյան ժամը 10:00-ին Գյումրի քաղաքում վրացական պետհամարանիշերով շահագործվող ավտոմեքենաների վարորդները պետք է մեկնեին Վանաձոր` մասնակցելու ժամը 12:00-ին կազմակերպված բողոքի ակցիային՝ ուղղված ՀՀ մաքսային օրենսդրության վերջին փոփոխությունների դեմ: Այն նախաձեռնել են Վանաձորի այն վարորդները, որոնց ավտոմեքենաները ևս վրացական պետհամարանիշերով են:
Սակայն ոստիկանության աշխատակիցները խոչընդոտել են մեքենաների շարժը դեպի Վանաձոր:
Վարորդները, այնուամենայնիվ, ուշացումով` ժամը 11:20-ին, ուղևորվել են Վանաձոր:
Արդեն Ջաջուռ գյուղի մոտ պարզվել է, որ ճանապարհը փակ է ոստիկանության աշխատակիցների կողմից:
Ինչպես տեղեկացնում է Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը, շուրջ հիսուն մեքենաների շարժը միակողմանիորեն Գյումրիից Վանաձոր դադարեցվել է:
Ախուրյանի ոստիկանության բաժնի պետի տեղակալ, փոխգնդապետ Գալստյանը հայտնել է հավաքվածներին, որ իրենք ունեն համապատասխան հրաման փակել ճանապարհը և թույլ չտալ վրացական պետհամարանիշեր ունեցող մեքենաներին ուղևորվել Գյումրիից Վանաձոր` ակցիային մասնակցելու նպատակով:
Սաքունցի այն հայտարարությանը, որ վերջինի գործողությունները հակաօրինական են, Գալստյանը պատասխանել է, որ դրանք օրինաչափ են և ինքը պատրաստ է պատասխանատվություն կրել իր գործողությունների համար:
Ժամը 1:30-ի դրությամբ բողոքի ակցիան դեռևս շարունակվում էր:
Հելսինկյան քաղաքացիական ասամբլեայի Վանաձորի գրասենյակ