Թուրքական Taraf թերթի վերլուծաբան Մեհմեթ Բարանսուն մեկնաբանել է հունիսի 22-ին Միջերկրական ծովում թուրքական F-4 ինքնաթիռի կործանումը, ինչի համար սկզբնական շրջանում թուրքական կողմը մեղադրեց Սիրիային, ապա հայտարարեց, որ նա կապ չունի ինքնաթիռի կործանման հետ:
Բարանսուն Ստամբուլում հանդիպել է Ասադին մոտ կանգնած մի փախստականի հետ, որին ամիսներ առաջ Ասադն ու նրա ընտանիքն առաջարկել են նախարարի պաշտոն, սակայն նա մեկնել է Իսքենդերուն: Սիրիայի նախարարների կաբինետի կազմի հրապարակումից հետո տեսնելով, որ իր անունը բացակայում է այնտեղ՝ փախստականը, որը չի ցանկացել հայտնել իր անունը, վերադարձել է Սիրիա:
Նա Բարանսուին ասել է, որ նախորդ շաբաթ Ասադի ռեժիմը հավաքել է մի խումբ մարդասպանների՝ իրեն ու իր ընտանիքին սպանելու համար, ինչի համար իրենք ստիպված են եղել փախչել Թուրքիա: Բարանսուն այժմ վստահեցնում է, որ նրանից ուշագրավ տեղեկություններ է ստացել կործանված թուրքական ինքնաթիռի երկու օդաչուների զոհվելու մասին։
«Մենք Սիրիայի ու տարածաշրջանի վերաբերյալ այդ մարդու հետ զրուցեցինք մի քանի ժամ: Նա ինձ ուշագրավ տեղեկություններ հայտնեց մեր կործանված ինքնաթիռի մասին, որոնցից ամենակարևորն այն էր, որ բոլոր տեղաբնակները տեսել են, թե ինչպես են այդ ինքնաթիռի օդաչուներն օդապարիկով իջնում ջուրը։
F-4 ինքնաթիռը մասնակցում էր Թուրքիայի ռազմածովային ուժերի հրամանատարության կողմից Սիրիայի Ազատ բանակի համար կազմակերպած զորավարժություններին: Պաշտոնական շրջանակներին հաղորդվել է, թե Կիպրոսի ափերին անցկացվում են զորավարժություններ:
Բացի թուրքական ռազմածովային ուժերի նավերից, այդ զորավարժություններին մասնակցել են նաև Սիրիայի ազատ բանակի 6 նավեր, որոնց օդից աջակցում էին երկու զինված F-16 և երկու սովորական F-4 ինքնաթիռ: F-4 ինքնաթիռներից մեկը երեք անգամ խախտել է Սիրիայի օդային տարածքը, և երրորդ անգամ այն վայր է գցվել հրթիռի օգնությամբ:
Տեղաբնակները տեսել են հրթիռի արձակումը և օդապարիկով օդաչուների իջնելը ծովի վրա, ինչով և բացատրվում է այն, որ Թուրքիան անհապաղ ուղղաթիռ է ուղարկել տվյալ շրջան: Սակայն նախազգուշական կրակոցով ուղղաթիռին վռնդել են տվյալ շրջանից, իսկ 40 րոպե անց դեպքի վայր են ժամանել սիրիական մարտական մոտորանավակները:
Իմ զրուցակիցը նշում է, որ ներկայումս Սիրիայում քննարկվում է երկու տարբերակ. ա) դրանցից մեկն օդաչուների ձերբակալումն է, նրանց հարցաքննումը Լաթաքիայում ու հետագա սպանությունը, բ) կամ էլ թուրք օդաչուներին հարցաքննել են հենց տեղում, որից հետո սպանել են նրանց և նետել ջուրը:
Փրկարարական աշխատանքները միայն չորրորդ օրը թույլատրելը նույնպես կապված է այս պնդումների հետ: Բացի այդ, չնայած պայթյունին՝ օդաչուները հայտնաբերվել են սաղավարտները գլխներին, ինչն ապացուցում է այդ պնդումները»:
