Փենսիլվանիայի համալսարանի վարչակազմը ապամոնտաժել է ֆուտբոլային մարզիչ Ջո Պատերնոյի արձանը, որը թաքցրել էր մանկապղծության մեջ մեղադրվող իր գործընկերոջ արարքը:
Ինչպես նշվում է համալսարանի նախագահ Ռոդնի Էրիքսոնի գրած նամակում, այդ արձանը հակասությունների տեղիք է տալիս և չի կարող մնալ ի տես հանրության:
Ինչպես հաղորդում է BBC News-ը, Պատերնոյի ընտանիքը հայտարարել է, որ արձանի ապամոնտաժումը ոչ մի կերպ չի կարող օգնել մանկապիղծի զոհերին: Մարզչի ընտանիքի անդամները նկատել են, որ միակ բանը, որով հնարավոր է նրանց օգնել, ճշմարտության հաստատումն է:
Ջո Պատերնոյի արձանը Փենսիլվանիայի համալսարանի բակում է տեղադրվել 2001թ.-ին`ի նշան երախտագիտության նրա կատարած ծառայությունների:
Նա համարվում է համալսարանական մակարդակով ամերիկյան ֆուտբոլի լավագույն մարզիչներից մեկը: Պատերնոն ղեկավարել է համալսարանի ֆուտբոլային թիմը 1966-2011թթ. և տարել է ավելի քան 400 հաղթանակ:
2011թ. նոյեմբերին նա ներքաշվել էր իր նախկին օգնական Ջերի Սանդասկիի հետ կապված սկանդալի մեջ: Վերջինս մեղադրվում էր անչափահասների նկատմամբ սեքսուալ բնույթի ոտնձգություններ կատարելու և նրանց բռնաբարելու մեջ:
2012թ. Սանդասկիի դեմ մեղադրանք առաջադրվեց. նրան սպառնում է ցմահ ազատազրկում:
Ինչ վերաբերում է Պատերնոյին, նա առնվազն բռնաբարության 1 դեպքի մասին տեղյակ է եղել, սակայն լռել է: Այդ մասին հայտնի է դարձել, երբ Պատերնոն արդեն ողջ չէր (մահացել է 2012 թվականին՝ քաղցկեղից):
